डोटीकाे भाइरल झोलुङ्गे पुलकाे अवलोकन गरेबापत अब कर तिर्नुपर्ने

पुष २१, २०७९ बिहीबार ११:१३:५१ | विमल बिष्ट

डोटी - डोटीको दिपायलमा निर्माण भएको भाइरल पुलका नामले चिनिँदै आएको झोलुङ्गे पुलकाे अवलोकन गरे वा पुलमा टिकटक बनाएबापत अब कर तिर्नुपर्ने भएको छ । दिपायल सिलगढी नगरपालिकाले झोलुङ्गे पुलकाे अवलोकन गरेबापत कर उठाउने तयारी गरेको हाे ।

सुदूरपश्चिम प्रदेश सरकारको लगानीमा दिपायल सिलगढी नगरपालिका–५ दुधेश्वर र २ नम्बर वडामा पर्ने कोटभैरव जोड्नका लागि पुल निर्माण भएको हो । दुई पर्यटकीय तथा धार्मिक स्थल जोड्ने गरी निर्माण भएको पुल दिपायल घुम्न आउने आन्तरिक पर्यटकको प्रमुख रोजाइमा पर्दै आएको छ । नगरपालिकाले अब शुल्क तिरेर मात्रै पुलकाे अवलोकन गर्न पाइने सूचना निकालेकाे छ ।

पुल अवलोकन गरेबापत शुल्क उठाउनका लागि दिपायल सिलगढी नगरपालिकाले यही पुस १२ गते दोस्रो पटक सूचना प्रकाशन गरेको थियाे । प्रत्येक महिना कम्तीमा पनि पाँच हजार दिनेगरी बढाबढमा प्रतिस्पर्धा हुनेगरी नगरपालिकाले दोस्रो पटक सूचना प्रकाशन गरेको हाे । द्धारीखोला माथि ७० मिटर उचाइ र २ सय मिटर लामो पुलबाट दृश्यावलोकन गरी टिकटक बनाउँदा, भिडियो खिच्दा तथा फोटो खिच्दा शुल्क तिर्नु पर्ने नियम नगरपालिकाले लागू गरेपछि स्थानीयवासी आक्रोसित बनेका स्थानीयवासी रामसिंह कामीले बताउनुभयो ।

उहाँले भन्नुभयो, ‘पर्यटकहरुलाई आकर्षित गर्नका लागि अन्य कार्यक्रम लागू गर्नुपर्नेबेला नगरपालिकाले पुल अवलोकन गर्नेबाट कर लिनु भनेको राम्रो कुरा होइन, नगरले कर हाेइन त्यहाँ भएका ऐतिहासिक धार्मिक स्थलको संरक्षणसहित प्रचारप्रसारमा ध्यान दिनुपर्छ।’

पुल अवलोकनका लागि कर तिर्नु पर्ने नियम नगरपालिकाले लागू गरेपछि अहिले सामाजिक सञ्जालहरुमा त्यसको विरोध भइरहेकाे छ । नगरपालिकाले पुलमा जाने आउने पर्यटकका कारण यहाँ निर्माण भएका संरचना भत्किन थालेकाले पुलसहितका अन्य भौतिक संरचनाको संरक्षणका लागि कर उठाउन लागेकाे जनाएकाे छ । पुल निर्माणका लागि २०७८ असारमा सम्झौता भएको थियाे भने देवभूमि कन्स्ट्रक्सन निर्माण सेवाले २०७९ असोजमा पुल निर्माणकाे काम सम्पन्न गरेको थियो ।

अन्तिम अपडेट: मंसिर १५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

विमल बिष्ट

विमल बिष्ट डोटीका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्