काठमाण्डाै – काठमाण्डाै जिल्ला अदालतले 'स्पट फिक्सिङ' काे आराेपमा पक्राउ परेका तीन जनालाई धराैटीमा छाड्न आदेश दिएकाे छ । 

आज बुधवार न्यायाधीश राजकुमार श्रेष्ठकाे एकल इजलासले राष्ट्रिय टाेलीका सदस्य माेहमद आदिल अन्सारी, राष्ट्रिय टोलीका पूर्वखेलाडी महबुब आलम र नितेश गुप्तालाई तीन लाख रुपैयाँ धराैटीमा छाड्न आदेश दिएकाे हाे । 

गएको पुस ९ देखि २७ सम्म काठमाण्डाैमा भएको नेपाल टी–२० लिगमा परिणामलाई प्रभावित पार्ने गरी मिलोमतो र अनलाइन सट्टेबाजी भएको सार्वजनिक भएपछि सीआईबीले अनुसन्धान गरेको थियो । सीआईबीले प्रतियोगितामा 'स्पट फिक्सिङ' भएको निष्कर्ष निकालेको थियो ।

जिल्ला सरकारी वकिल कार्यालय काठमाण्डाैले गएकाे साेमवार पाँच जनाविरुद्ध 'स्पट फिक्सिङ' को आराेपमा जिल्ला अदालत काठमाण्डाैमा मुद्दा दर्ता गरेको थियाे । यसअघि सीआईबीले नेपाल टी–२० क्रिकेट लिगमा भएको भनिएको 'स्पट फिक्सिङ' प्रकरणमा १२ जनालाई प्रतिवादी बनाएर मुद्दा चलाउनुपर्ने रायसहित आफ्नो प्रतिवेदन जिल्ला सरकारी वकिलको कार्यालयमा बुझाएको थियाे । कार्यालयले पाँच जनाविरूद्ध मात्रै मुद्दा दर्ता गरेको थियो । यसमा नवीन कँडेल र रवि माझी भने फरार छन् ।