एमाले अध्यक्ष ओलीद्वारा गुल्मीमा कालोपत्र सडक उद्घाटन

चैत १४, २०७९ मंगलबार १८:१२:३९ | प्रेमनारायण आचार्य

गुल्मी – नेकपा एमालेका अध्यक्ष एवम् पूर्वप्रधानमन्त्री केपी शर्मा ओलीले २०५१ सालमा एमाले सरकारले सुरु गरेको 'आफ्नो गाउँ आफैँ बनाउँ' भन्ने नारासँगै विकासको अभियान सुरु गरेको बताउनुभएको छ । उहाँले तत्कालीन गाउँ विकास समितिको पालादेखि विकासको लहर सुरु भएसँगै ग्रामीण क्षेत्रमा पनि विकासकाे लहर आएकाे बताउनुभयो ।

गुल्मीको छत्रकोट गाउँपालिका ४ अन्तर्गत पिपलनेटा, धरमपानी, मानकोट, दौघा, हुँदै अर्घाखाँचीको फर्सा टाकुरा जोड्ने सडक खण्डको डेढ किलोमिटर कालोपत्र सडकको मङ्गलवार उद्घाटन गर्दै अध्यक्ष ओलीले यस्ताे बताउनुभएकाे हाे । उहाँले देशभर आफूहरूको सरकार हुँदा नागरिकले आशा गर्न लायक थुप्रै विकासका कामहरू सुरु भएकाे दाबी गर्नुभयाे । एमाले देशको विकासमा नागरिकसँगै रहेको भन्दै सञ्चालित योजनालाई पूर्णता दिन आफूहरूको सहयोग रहने उहाँले प्रतिबद्धता जनाउनुभयाे ।

आज उद्घाटन गरिएकाे सडक प्रदेश समपूरक कोषअन्तर्गत दुई करोड तीन लाख ८० हजार रुपैयाँमा पुष्पाञ्जली शंकर जेभी तम्घासले निर्माण गरेको छत्रकोट गाउँपालिका अध्यक्ष रामप्रसाद पाण्डेले बताउनुभयाे । गुल्मी, पाल्पा र अर्घाखाँची जोड्ने १७ किलोमिटर सडक खण्डअन्तर्गत पहिलो चरणमा पिपलनेटा घडेरीटोला खण्ड कालोपत्र गरिएको गाउँपालिकाका प्रमुख प्रशासकीय अधिकृत वीरबहादुर पुनले जानकारी दिनुभयाे ।

आउँदो असार मसान्तमा सम्पन्न गर्ने गरी गएकाे मङ्सिरमा सम्झौता गरिएको यस सडक कालोपत्रको काम सम्झौता सकिनुभन्दा तीन महिनाअघि नै सम्पन्न भएकाे निर्माण व्यवसायी सञ्जय पन्थीले बताउनुभयाे । छत्रकोट गाउँपालिकाका सम्झौता भएका धेरै सडककाे काम निर्माण कम्पनीले अलपत्र पारेकाे अवस्थामा पुष्पाञ्जली शंकर जेभीले भने समयअघि नै काम सम्पन्न गरेको हो ।

२०४९/५० सालमा पहिलो ट्र्याक खोलिएको यस सडक छत्रकोट गाउँपालिकाभित्र रहेका आन्तरिक सडकहरूमध्ये पहिलो कालोपत्र भएकाे सडक हो । सडक निर्माण भएको झन्डै तीन दशकपछि कालोपत्र गर्न सुरु भएपछि स्थानीय खुसी भएका छन् ।

अन्तिम अपडेट: मंसिर ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

प्रेमनारायण आचार्य

प्रेमनारायण आचार्य अर्घाखाँची उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्