भ्रष्टाचारको 'नेक्सस' ठूलै छ, सत्ता गठबन्धन पनि शुद्ध छ भन्न सकिन्नँ : गृहमन्त्री श्रेष्ठ

साउन ९, २०८० मंगलबार १३:४५:४० | किरण लोहनी

गाेरखा – गृहमन्त्री नारायणकाजी श्रेष्ठले विभिन्न ढङ्गले सरकारको भ्रष्टाचार विरोधी अभियानलाई रोक्ने प्रयास भइरहेको जिकिर गर्नुभएकाे छ । सत्ता गठबन्धनकै सांसदले आफ्नो राजीनामा माग्नुलाई पनि उहाँले अभियान रोक्ने प्रयासको रूपमा टिप्पणी गर्नुभयो ।

गृहजिल्ला गोरखामा प्रेस सेन्टर नेपालले गरेको पत्रकार सम्मेलनमा गृहमन्त्री श्रेष्ठले गलत प्रवृत्ति भएका पात्रहरू सत्ता गठबन्धनभित्रै पनि हुन सक्ने बताउनुभयो । उहाँले सत्तापक्षकै सांसदले आफ्नो राजीनामा मागेको विषयलाई अस्वाभाविक रूपमा नलिएको पनि बताउनुभयो ।

‘यो समाजमा त्यत्रो ठूलो समस्या छ र त हामी भ्रष्टाचार विरोधी, अनियमितता विरोधी, बेथिति विरोधी अभियान चलाइरहेका छौँ’, उहाँले भन्नुभयो, ‘भ्रष्टाचारीहरूको नेक्सस ठूलै छ । विभिन्न ढङ्गबाट भ्रष्टाचार विरोधी अभियानलाई रोक्न प्रयास भइरहेको छ तर त्यो प्रयत्नलाई हामी असफल पार्छाैँ ।’

सत्ता गठबन्धनबाटै पनि भ्रष्टाचार विरोधी अभियानलाई रोक्ने प्रयास भइरहेको हो भन्ने जिज्ञासामा गृहमन्त्री श्रेष्ठले भन्नुभयो, ‘हुन सक्छ, हाम्रो पार्टी नै शुद्ध हुन्छ भन्ने छैन । नेपाली कांग्रेससहितको हाम्रो गठनबन्धन नै शुद्धै शुद्ध छ भन्न त सकिन्नँ नि ।’ नक्कली भुटानी शरणार्थी, ललिता निवासलगायतका प्रकरणको अनुसन्धान जारी रहेको उहाँले बताउनुभयो । ‘अनुसन्धानमा विराम लागेको छैन, जारी छ । तथ्य प्रमाणले जहाँसम्म पुग्नुपर्छ, सरकार पुग्छ । ठूलो होस् कि सानो होस् दोषी छ भने कानुनको दायरामा जो कोही आउँछ’, उहाँले भन्नुभयाे ।

गृहमन्त्री श्रेष्ठले त्रिभुवन अन्तर्राष्ट्रिय विमानस्थलबाट ठूलो परिमाणमा सुन बाहिरिएको विषयलाई सरकारले निकै गम्भीर र संवेदनशीलरूपमा लिएको बताउनुभयो । विमानस्थलको सुरक्षालाई सरकारले नयाँ ढङ्गले व्यवस्थापन गर्ने तयारी गरिरहेको पनि उहाँले जानकारी दिनुभयो ।

‘प्रधानमन्त्रीको उपस्थितिमा एअरपोर्टका सबै निकायहरूसँग छलफल गरेका छौँ, नयाँ ढङ्गले व्यवस्थापन गर्नुपर्छ भन्ने सोच बनाएका छौँ’, उहाँले भन्नुभयो, ‘प्रारम्भिक कदमको रूपमा हामीले आगमन कक्षमा कहीँ पनि लगेज वा कार्गोको स्क्रिनिङमा प्रहरीको उपस्थिति नै नहुने अहिलेको अवस्था छ, त्यसलाई परिवर्तन गरेर त्यहाँ पनि प्रहरीको उपस्थिति गराउने र अरूको हकमा चाहिँ प्रविधिसहित नयाँ ढङ्गले त्यसको व्यवस्थापन गर्ने गरी तयारी गरिरहेका छौँ ।’

सुन प्रकरणको अनुसन्धान पनि अघि बढिरहेको भन्दै गृहमन्त्री श्रेष्ठले अनुसन्धानका क्रममा जरैसम्म पुग्नका लागि निर्देशन दिएको र त्यसका आधारमा सम्बन्धित सबैलाई कारबाहीको दायरामा ल्याइने बताउनुभयो ।

अन्तिम अपडेट: कात्तिक ३०, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

किरण लोहनी

उज्यालोका गोरखा सम्वाददाता किरण लोहनी गोरखाको च्वाइस एफएममा पनि काम गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

भ्रष्टाचारको 'नेक्सस' ठूलै छ, सत्ता गठबन्धन पनि शुद्ध छ भन्न सकिन्नँ : गृहमन्त्री श्रेष्ठ

फाइल फाेटाे

तपाईको प्रतिक्रिया