कोशी प्रदेशमा डेङ्गीबाट ज्यान गुमाउनेको सङ्ख्या १४ पुग्यो, २२ हजारभन्दा धेरै सङ्क्रमित

भदौ ८, २०८० शुक्रबार ८:१०:३१ | उज्यालो सहकर्मी

काठमाण्डाै - डेङ्गी सङ्क्रमणबाट कोशी प्रदेशमा अहिलेसम्म १४ जनाले ज्यान गुमाएका छन् । २२ हजार दुई सय ३७ जना सङ्क्रमित भएका छन् ।

डेङ्गीबाट सबैभन्दा धेरै सुनसरी जिल्ला प्रभावित छ । सुनसरीमा मात्रै १२ जनाले ज्यान गुमाएका प्रदेश स्वास्थ्य निर्देशनालय धनकुटाका जनस्वास्थ्य अधिकृत विवेचना चम्लागाईँले जानकारी दिनुभयो । उहाँका अनुसार सुनसरीमा मात्रै झण्डै १६ हजार जना सङ्क्रमित भएका छन् ।

कोशी प्रदेशको सुनसरीसहित १४ वटै जिल्लामा डेङ्गीको सङ्क्रमण फैलिएको छ । उहाँका अनुसार मोरङमा तीन हजार तीन सय ६३ सङ्क्रमित हुँदा एक जनाको ज्यान गएको छ । झापामा एक हजार चार सय २० सङ्क्रमित छन् ।

झापामा पनि एक जनाको ज्यान गएको तथ्याङ्क छ । देशका ७५ वटा जिल्लामा डेङ्गी फैलिएको छ । स्वास्थ्य मन्त्रालयको इपिडिमियोलोजी तथा रोग नियन्त्रण महाशाखाका अनुसार कर्णालीको मुगु र हुम्लामा यसवर्ष डेङ्गीको सङ्क्रमण भेटिएको छैन ।

महाशाखाका प्रमुख रुद्र मरासिनीका अनुसार देशभरको पूर्ण विवरण सङ्कलन गर्ने काम भैरहेको छ । उहाँले सङ्क्रमण अझै उच्च बिन्दुमा जान सक्ने भएकाले सङ्क्रमण बढ्न नदिन सबैले सतर्कता अपनाउँदै रोग नियन्त्रण र रोकथाममा सहयोग गर्नुपर्ने बताउनुभयो । विशेष गरी गर्मी र बर्खायाममा लामखुट्टेको टोकाइबाट लाग्ने डेङ्गी फैलिने गरेको छ । केही दिन पानी पर्ने अनि घाम लाग्ने हुँदा तापक्रममा आउने उतारचढावले सङ्क्रमण फैलिने गरेको छ ।

डेङ्गी रोग एडिज एजिप्टी र एडिज एल्बोपिक्टस प्रजातिको लामखुट्टेको टोकाइबाट सर्छ । नेपालमा असोज महिनामा प्रकोप उच्च बिन्दुमा पुगेपछि बिस्तारै घट्ने गरेको छ । आफ्नो घर र कार्यालयबाट लामखुट्टेको वृद्धि र विकास हुन नदिन, पानी जम्ने खाल्डाखुल्डी पुर्न तथा लामखुट्टेको टोकाइबाट जोगिन महाशाखाका प्रमुख मरासिनीको आग्रह छ ।

ज्वरो आउने, बान्ता हुने, छालामा डाबर आउनेलगायत डेङ्गीका लक्षण हुन् । आन्तरिक रक्तस्राव, पेट दुख्ने, नाक वा गिजाबाट रगत आउने, दिशामा रगत देखिने जस्ता समस्या भएमा अस्पताल जान डाक्टरको सुझाव छ ।

अन्तिम अपडेट: मंसिर १२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्