बजेट अभावले अर्घाखाँचीका १ सय ३१ खानेपानी योजना अलपत्र

माघ १६, २०८० मंगलबार १३:२९:४८ | प्रेमनारायण आचार्य

अर्घाखाँची - अर्घाखाँचीमा चालु आर्थिक वर्ष निर्माण सम्पन्न हुने झन्डै एक सय ३१ वटा खानेपानी आयोजना बजेट अभावका कारण अलपत्र परेका छन् । क्रमागत ५८ वटा खानेपानी योजनामा यस वर्ष आएको बजेटभन्दा बढी रकमको काम विगतका वर्षहरुमा नै उपभोक्ता समितिले सम्पन्न गरिसकेका छन् । तर रकम भने पाउन सकेका छैनन् ।

क्रमागत ५८ वटा योजनामा विगतका वर्षहरुमा नै १० करोड ५१ लाखको काम सम्पन्न भए पनि रकम अभावले विगतका वर्षको पनि रकम भुक्तानी गर्न नसकिएको खानेपानी तथा सरसफाइ डिभिजन कार्यालय अर्घाखाँचीका प्रमुख इञ्जिनीयर रामभरोस यादवले बताउनुभयो ।

चालु वर्षमा विभिन्न एक सय ३१ योजनामा ११ करोड ६५ लाख रुपैयाँ रकम बजेट आएको छ । यसअघि नै काम गरेका ५८ योजनाको रकम भुक्तानी गर्नका लागि १० करोड ५१ लाख रुपैयाँ बाँकी छ । योजनाहरु अलपत्र परेका छन् । जिल्लामा भएका सबै योजनाहरु सम्पन्न गर्न ३ अर्बभन्दा धेरै लाग्ने अनुमान छ । तर खानेपानी योजनामा विगतमा भएका कामको पनि रकम भुक्तानी गर्न नसकिएपछि समस्या आएको खानेपानी तथा सरसफाइ डिभिजन कार्यालय अर्घाखाँचीले जनाएको छ ।

सम्पन्न भएका योजनाको भुक्तानीका लागि आवश्यक बजेट विनियोजन गर्न र रकम निकासा गर्न पटकपटक लुम्बिनी प्रदेश सरकारको खानेपानी, ग्रामीण तथा सहरी विकास मन्त्रालयलाई पत्राचार तथा मन्त्रालयमै गएर ध्यानाकर्षण गराउँदा पनि रकम निकासा हुन नसकेको खानेपानी कार्यालय अर्घाखाँचीका प्रमुख यादवको भनाइ छ । काम गरेको रकम पनि पाउन नसकेको अवस्था छ । केही संरचना त जीर्ण बनेका शीतगङ्गा–१० सिद्धाराका हिम्मत पोख्रेलले बताउनुभयो ।

अर्घाखाँची र प्युठानमा खानेपानी आयोजनामा गर्नुपर्ने निर्माण संरचना बनिसकेका कामको रकम भुक्तानीका लागि सचिवस्तरमा तथा मुख्यमन्त्री स्तरमा पटक पटक छलफल भएको तर निष्कर्षमा पुग्न नसकिएको वन वातावरण, पर्यटन तथा खानेपानी मन्त्रालयका महाशाखा प्रमुख इञ्जिनीयर गुणानिधि पोख्रेलले बताउनुभयो ।

खानेपानी डिभिजन कार्यलयका सूचना अधिकारी गोविन्दप्रसाद आचार्यका अनुसार मन्त्रालयबाट आउने बजेट बर्सेनि घट्दै गएको छ । आयोजनाको लागत अनुमानका आधारमा काम गर्न बर्सेनि कम्तीमा ५० करोड बजेट आवश्यक पर्ने भए पनि चालु आर्थिक वर्षमा झण्डै १३ करोड रुपैयाँमात्रै अख्तियारी आएको छ ।

डिभिजन प्रमुख यादव भन्नुहुन्छ 'हामीले सबै काम द्रुतगतिमा गर्छौँ भनेर मात्रै भएन । रकम अभावले काम रोकिएका छन् । सबै आयोजना पाइप लाइनमै छन्, बजेट अभावका कारण काम अघि बढाउन नसक्दा थुप्रै आयोजना सम्पन्न नहुँदै भग्नावशेषमा परिणत हुने अवस्था आएको छ ।'

अन्तिम अपडेट: मंसिर ८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

प्रेमनारायण आचार्य

प्रेमनारायण आचार्य अर्घाखाँची उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

बजेट अभावले अर्घाखाँचीका १ सय ३१ खानेपानी योजना अलपत्र

फाइल तस्बिर

तपाईको प्रतिक्रिया