केबल न्यूज नेटवर्क (सीएनएन) ले आफ्ना वरिष्ठ पत्रकार जिम एकोस्टाको परिचय पत्र ह्वाइट हाउस प्रवेशका लागि रद्द गरेपछि ट्रम्प प्रशासनविरुद्ध मुद्दा दायर गरेको छ ।

जिम एकोस्टा ह्वाइट हाउसका लागि सीएनएनका प्रमुख संवाददाता रहेका थिए, गएको हप्ता पत्रकार सम्मेलनमा राष्ट्रपति डोनाल्ड ट्रम्पसँगको बहसपछि उनको ‘प्रेस हार्ड पास’ फिर्ता लिइएको थियो ।

सीएनएनले राष्ट्रपति कार्यालयले संवैधानिक अधिकारको उल्लंघन गरेको आरोप लगाएको छ । 

मंगलबार वासिङ्गटनको अदालतमा दायर गरिएको मुद्दामा राष्ट्रपति ट्रम्प र उनका सहयोगीलाई प्रतिवादी बनाइएको छ । राष्ट्रपति ट्रम्पसँग चिफ अफ स्टाफ जोन केली र ह्वाइट हाउसकी प्रवक्ता सारा स्याण्डर्स पनि रहेका छन् ।

के भएको थियो पत्रकार सम्मेलनमा ?

यो घटना ७ नोभेम्बरको हो । डोनाल्ड ट्रम्प र एकोस्टाको बीचमा केही प्रश्नहरुलाई लिएर बहस भएको थियो । बहसको एकदिन पछि उनको पास रद्ध गरिएको थियो । 

संवाददाता एकोस्टाले मेक्सिकोका शरणार्थी र मेक्सिकोबाट अमेरिकातर्फ बढी रहेका प्रवासीका बारेमा प्रश्न गरिरहेका थिए । राष्ट्रपति ट्रम्पसँग प्रश्न गरिरहेका बेला ह्वाइट हाउसमा कार्यरत एक महिला कर्मचारीले उनको माइक्रोफोन खोस्न खोजेकी थिइन् । तर एकोस्टाले माइक्रोफोन दिन मानेनन् र राष्ट्रपति ट्रम्पलाई अर्को प्रश्न गर्ने प्रयास गरेका थिए । 

— Sarah Sanders (@PressSec) November 8, 2018