साउदीमा ८ वर्षदेखि अचेत अवस्थामा उपचाररत बाटुलीलाई स्वदेश ल्याइयो

भदौ ३०, २०७९ बिहीबार १०:४८:२ | उज्यालो सहकर्मी

काठमाण्डौ – साउदीमा ८ वर्षदेखि अचेत अवस्थामा उपचाररत रुपन्देहीको ओमसतिया गाउँपालिका २ की बाटुली सुनारलाई दूतावासको सहयोग र समन्वयमा नेपाल ल्याइएको छ ।

आफूले काम गर्ने घरको माथिल्लो तलाको भर्‍याङबाट तल खस्दा गम्भीर घाइते हुनुभएकी बाटुलीलाई अस्पतालले परिवारको साथमा राखेर उपचार गर्दा छिटो निको हुन सक्ने भन्दै स्वदेश लैजान भनेपछि दूतावासले परिवार र साउदीको विभिन्न निकायसँग समन्वय गरी नेपाल पठाएको जनाएको छ ।

रोजगारीका लागि सन् २०१४ मा साउदी पुग्नुभएकी बाटुली त्यहाँ पुगेको ६ महिनामा नै दुर्घटनामा पर्नुभएको थियो ।

घरेलु कामदारका रूपमा सुरुमा कुवेत गएको भए पनि त्यहाँबाट उहाँलाई गैर कानुनी रूपमा साउदीमा लगिएको दूतावासले जनाएको छ । साउदीमा काम गर्ने क्रममा घरको माथिल्लो तल्लाको भर्‍याङबाट चिप्लिएर तल खस्दा बाटुलीको टाउको गम्भीर चोट लागेको थियो । जसको कारण उहाँ अचेत अवस्थामा पुग्नुभएको थियो ।

तर करिब ८ वर्ष उपचार गर्दा पनि उहाँको स्वास्थ्यमा खासै सुधार नआएको दूतावासले उल्लेख गरेको छ । दूतावासका अनुसार, अस्पतालमा राखेर उपचार गर्दा खासै सुधार नआएपछि डाक्टरले नै परिवारको साथमा राखेर उपचार गर्दा केही सुधार हुन सक्ने भन्दै नेपाल पठाउन अनुरोध गरेका थिए ।

नेपाल पठाउन अस्पतालले निरन्तर ताकेता गरे पनि पठाउन नसकेको र यस पटक भने परिवार पनि बिरामीको जिम्मा लिन तयार भएकाले पठाउन सहज भएको दूतावासले जनाएको छ ।

दूतावासले नै बाटुलीको आवश्यक कागजात तयार गर्नुका साथै उहाँको एक्जिट भिसाका लागि साउदी श्रम कार्यालय र अध्यागमन कार्यालयसँग समन्वय गरेको थियो ।

यसका साथै बाटुलीलाई नेपाल ल्याउनका लागि नेपाल एयरलाइन्सको जहाजमा स्ट्रेटचर राख्ने व्यवस्था गर्न र स्ट्रेटचर बापतको खर्च भने वैदेशिक रोजगार बोर्डले व्यहोरेको हो । बाटुली गएको आइतबार नेपाल आइपुग्नुभएको छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

(अनिवार्य)