सहकारी ठगीमा मुछिएका जीबी राईलाई यसअघिको सरकारले भगाएको हो : गृहमन्त्री लामिछाने

वैशाख २९, २०८१ शनिबार १२:३:१ | उज्यालो सहकर्मी

काठमाण्डौ – उपप्रधान तथा गृहमन्त्री रवि लामिछानेले सहकारी ठगीमा मुछिएका जीबी राईलाई यसअघिको सरकारले भगाएको आरोप लगाउनुभएको छ । चितवनमा आज बिहान पत्रकारसँगको कुराकानीमा उहाँले भगाएको मानिस खोज्न समय लाग्ने प्रतिक्रिया दिनुभयो ।

राईलाई कसले भगाएको हो ? भन्ने प्रश्नमा लामिछानेले ‘भाग्दाखेरी सरकारमा को थियो ? भनेर प्रतिप्रश्न गर्नुभएको छ । उहाँले राईलाई पक्राउ गर्न आवश्यक केही प्रक्रिया पूरा गर्नुपर्ने बाध्यता भएकोले समय लागेको बताउनुभएको छ । राई बुटवलको सुप्रिम बचत तथा ऋण सहकारी र पोखराको सूर्यदर्शन सहकारीको रकम हिनामिना प्रकरणमा मुछिएका छन् । उनी मलेसियामा रहेको भनिएको छ ।

मलेसियाका गृहमन्त्रीसँग आफ्नो कुरा भएको मन्त्री लामिछानेको दाबी छ । मलेसियासँग सुपुर्दगी सन्धी नभएकाले पक्राउ गर्न र स्वदेश ल्याउन कठिन भएको उहाँले बताउनुभएको छ ।

गृहमन्त्री एवम् राष्ट्रिय स्वतन्त्र पार्टीका सभापति लामिछानेले संसदमा बोल्ने आफ्नो अधिकारको हनन् भएको टिप्पणी पनि गर्नुभएको छ । उहाँले भन्नुभयो,‘छानबिन समिति बनाए हुन्छ तर संसद्मा बोल्न पाउनुपर्छ ।’ आफूमाथि लागेको आरोप प्रमाणित गर्न पनि उहाँको चुनौती छ ।

गृहमन्त्री लामिछाने समेत जोडिएको भनिएको सहकारीको रकम हिनामिना प्रकरणमा संसदीय छानबिन समिति नबनाएसम्म संसदको अवरोध कायमै राख्ने प्रमुख प्रतिपक्ष दल कांग्रेसले अडान राख्दै आएको छ । संसदीय छानबिन समिति गठनका विषयमा सत्तापक्ष र प्रतिपक्षबीच सहमति नहुँदा हिजोदेखि शुरु भएको संघीय संसद्को बजेट अधिवेशन पहिलो दिन प्रभावित भएको छ ।

अन्तिम अपडेट: मंसिर ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

सहकारी ठगीमा मुछिएका जीबी राईलाई यसअघिको सरकारले भगाएको हो : गृहमन्त्री लामिछाने

फाइल तस्बिर

तपाईको प्रतिक्रिया