कैलाली - धनगढीमा जारी तेस्रो निष्ट कलेज लिटिल फ्लावर प्रिमियर लिगमा काठमाडौंको हिमालयन ह्वाइटहाउस स्कुल र कञ्चनपुरको लिटिल बुद्ध सेमीफाइनलमा प्रवेश गरेका छन् । 

आइतबारको खेलमा जित निकाल्दै दुवै टिमले अन्तिम ४ मा स्थान सुरक्षित बनाएका हुन्। 

आइतबार भएको पहिलो खेलमा लिटिल बुद्ध एकेडेमीले मोक्षदा स्कुल काठमाडौंमाथि ८२ रनको जित निकाल्यो । टस हारेर ब्याटिङको निम्तो पाएको लिटिल बुद्ध एकेडेमी महेन्द्रनगरले निर्धारित २० ओभरमा ७ विकेट गुमाउँदै १ सय ७८ रन बनायो । 

१ सय ७९ रनको लक्ष्य पछ्याउँदै जवाफी ब्याटिङ गरेको मोक्षदा स्कुल काठमाडौले निर्धारित २० ओभरमा ८ विकेट गुमाउँदै मात्र ८१ रन बनाउन सक्यो। 
लिटिल बुद्धका हेमन्त कार्की म्यान अफ द म्याच भए।

यस्तै आइतबारै सम्पन्न लिग चरणको अन्तिम खेलमा हिमालयन ह्वाइट हाउस स्कुल काठमाडाैंले कैलाली मोडल स्कुलमाथि ११० रनको फराकिलो जित निकालेको छ । उत्कृष्ट ब्याटिङ र बलिङ गर्दै फराकिलो जित निकालेको हिमालयन सेमिफाइनल प्रवेश गरेको छ भने पराजित भएको कैलाली मोडल प्रतियोगिताबाट बाहिरिएको छ ।

टस जितेर पहिला ब्याटिङ गरेको हिमालयन ह्वाईट हाउसले २० ओभरमा ६ विकेट गुमाउँदै १७९ रन बनायो। 

१८० रनको लक्ष्य पछ्याउँदै जवाफी ब्याटिङ गरेको कैलाली मोडलले निर्धारित २० ओभरमा ९ विकेट गुमाउँदै मात्र ६९ रन बनाउन सकेको थियो 
हिमालयनका अंकित सुवेदी म्यान अफ द म्याच भए ।

यसैबीच प्रतियोगिता अन्तर्गत लिग चरणको समीकरण पूरा भएको छ । लिग चरणबाट सिद्धार्थ शिशु सदन कैलाली, लिटिल फ्लावर स्कुल धनगढी, लिटिल बुद्ध एकेडेमी कन्चनपुर र हिमालयन ह्वाइटहाउस सेमिफाइनल प्रवेश गरेका छ्न् ।

प्रतियोगिता अन्तर्गत सेमिफाइनल खेलहरु मङ्सिर ३ गते हुनेछ्न भने फाइनल खेल मङ्सिर ४ गते हुनेछ ।