पर्वत – उत्तर–दक्षिण जोड्ने राष्ट्रिय गौरवको कालीगण्डकी करिडोरअन्तर्गत पर्वत खण्डमा पर्ने फलेवास–अर्मादी सडक सम्झौता अवधि सकिएको छ वर्षसम्म पनि पूरा हुनसकेको छैन । मिर्मिबाट फलेवाससम्मको ३३ किलोमिटर सडक कालोपत्र भइसकेको भए पनि फलेबास–अर्मादी खण्डको १४ किलोमिटर सडक ठेकेदारको ढिलासुस्तीका कारण अलपत्र छ ।

२०७३ सालको असार २२ गते सम्झौता भई २०७५ जेठ २१ मा सम्पन्न गर्नुपर्ने भए पनि अझै २० प्रतिशतभन्दा बढी काम बाँकी छ । शुरुमा ठेकेदारले विभिन्न कारण देखाएर काममा ढिलाइ गरेको र अहिले भिरमा बम विस्फोट गरेर चट्टान फुटाउनुपर्ने भएका कारण कामले गति लिन नसकेको हो ।

ठूलो भीरमा विस्फोटक पदार्थ प्रयोग गर्दा कुश्मा–कैया झोलुङ्गे पुललाई असर पर्ने भन्दै जिल्ला समन्वय समितिले वैकल्पिक उपाय अपनाउन भनेपछि अहिले काम रोकिएको कालीगण्डकी करिडोर आयोजना कार्यालय इन्जिनियर सुरेन्द्र गौतमले बताउनुभयो ।