प्यालेस्टिनी शरणार्थीका लागि संयुक्त राष्ट्र सङ्घीय राहत तथा कार्य निकाय (यूएनआरडब्लूए) ले गाजामा विस्थापित परिवारले आश्रय लिइरहेका ६९ प्रतिशत विद्यालय भवनमा क्षति पुगेको जनाएको छ ।

यूएनआरडब्ल्यूले मानवीय कानुनको घोर अवहेलना रोक्नैपर्ने बताउँदै गाजामा कहीँ पनि सुरक्षित नभएको र अब युद्धविरामको आवश्यकता रहेको बताएको कतार न्युज एजेन्सीले जनाएको छ । गाजामा ७६ प्रतिशतभन्दा बढी विद्यालय पुनर्निर्माणको अवस्थामा पुगिसकेका छन् ।

यूएनआरडब्ल्यूएका प्रवक्ता जोनाथन फाउलरले गाजा पट्टीमा इजरायली आक्रमणका कारण भएको विनाशलाई मेटाउन र पुनर्निर्माण गर्न २० वर्षभन्दा धेरै समय लाग्ने बताउनुभएको छ । गाजा पट्टीमा रहेका झन्डै एक सय ७० यूएनआरडब्ल्यूएका सुविधाहरूमा बमबारी गरिएको खबरमा उल्लेख छ ।

प्रवक्ता फाउलरले आक्रमणको शुरुआतदेखि नै पठनपाठन बन्द भएकाले विद्यालय नै सबैभन्दा बढी क्षति भएका बताउनुभयो । गाजा विद्यालयहरूलाई विस्थापित भएका नागरिकका लागि आपत्कालीन आश्रयस्थलमा रूपान्तरण गरिएका छन् ।