काठमाण्डाै – श्रीलङ्का क्रिकेट टिमका मुख्य प्रशिक्षक क्रिस सिल्भरवुडले पदबाट राजीनामा दिएका छन् ।

इङ्गल्यान्डका पूर्व तीव्र गतिका बलर सिल्भर सन् २०२२ मा श्रीलङ्का क्रिकेट टिमका मुख्य प्रशिक्षक नियुक्त भएका थिए । उनको नेतृत्वमा श्रीलङ्काले केही महत्त्वपूर्ण प्रतियोगिता र शृङ्खला खेलेको थियो ।

सिल्भरवुडकाे कार्यकालमा श्रीलङ्काले सन् २०२२ को एसिया कप, अस्ट्रेलियासँगको एकदिवसीय शृङ्खला र बङ्गलादेशसँगको टेस्ट शृङ्खला जितेको थियो । यस्तै श्रीलङ्का सन् २०२३ को एसिया कप फाइनलमा पनि पुगेको थियो ।

यद्दपि श्रीलङ्का भर्खरै भएका आईसीसी प्रतियोगिता– सन् २०२२ र २०२४ को टी–२० विश्वकप र सन् २०२३ को एकदिवसीय विश्वकपको नकआउट चरणसम्म पनि पुग्न सकेन । यस्तै अहिले चलिरहेको टी–२० विश्वकपमा त श्रीलङ्का ‘सुपर–आठ’ सम्म पनि पुग्न सकेन ।

मुख्य प्रशिक्षक सिल्भरवुडले राजीनामा दिनुको पछाडि व्यक्तिगत कारण भएको बताएका छन् । यसअघि हिजो मात्रै महेला जयवर्द्धनेले ‘सल्लाहकार प्रशिक्षक’ को पदबाट राजीनामा दिएका थिए ।