काठमाण्डाै – नेकपा (एकीकृत समाजवादी) को केन्द्रीय कमिटी बैठकले केन्द्रीय सदस्यको नामावली सिफारिश गर्ने जिम्मेवारी प्रदेशका इन्चार्ज र सचिवलाई दिएको छ ।

पार्टी अध्यक्ष माधवकुमार नेपालको अध्यक्षतामा आज बसेको बैठकले भूगोल, क्षेत्र तथा सन्तुलन मिलाएर क्षमताका आधारमा सम्बन्धित प्रदेशलाई केन्द्रीय कमिटी सदस्यको नाम केन्द्रमा पठाउन जिम्मेवारी दिएको नेकपा (एकीकृत समाजवादी) का नेता सोमप्रसाद पाण्डेले जानकारी दिनुभयो । सबै प्रदेशबाट सिफारिश गरिएका सदस्यको अन्तिम टुङ्गो केन्द्रीय कमिटीले लगाउने छ ।

अस्ति शुक्रवार सम्पन्न पार्टीकाे महाधिवेशनले अध्यक्ष, सम्मानित नेता, महासचिवसहित ९३ केन्द्रीय सदस्य सर्वसम्मत चयन गरेको थियो । पार्टीमा २ सय ९९ सदस्यीय कार्यसमिति तथा २१ पदाधिकारी रहने व्यवस्था गरिएको छ ।