लमजुङ – चौबीसे राज्यका पालाको लमजुङ दरबार पुनर्निर्माण भइरहेको छ । सोह्रौँ शताब्दीमा बनेको जिकिर गरिएको दरबार जीर्ण भएपछि पुरातत्त्व विभागले दुई वर्षअघि पुनर्निर्माण थालेको थियो ।

विभागका इन्जिनियर गोविन्द अधिकारीका अनुसार दरबार पुनर्निर्माणमा झन्डै ७० प्रतिशत भौतिक प्रगति भएको छ । स्रोतको कमी भएन भने आउँदाे आर्थिक वर्षभित्रमा काम पूरा गर्ने लक्ष्य लिइएको छ । गएको आर्थिक वर्षमा १ करोड ३३ लाख रुपैयाँ बजेटबाट पुनर्निर्माण शुरु गरिएकाेमा चालू आर्थिक वर्षमा सरकारले जम्मा ५० लाख रुपैयाँ बजेट छुट्टाएको थियो ।

पहिलो वर्ष भक्तपुरको निर्माण कम्पनी ‘एनपीएस’ र यो वर्ष भक्तपुरकै ‘आरजीएस/विष्णु जेभी’ ले दरबार पुनर्निर्माणको जिम्मा पाएको हो ।

इन्जिनियर अधिकारीले पुरानै शैली र स्वरूपमा दरबारको पुनर्निर्माण भइरहेको बताउनुभयो । दरबार बुइँगलसहित तीन तले र कालिका मन्दिर प्यागोडा शैलीको बन्नेछ । दरबार बनाउन चाहिने इँटा, काठ, सुर्कीलगायत निर्माण सामग्री भक्तपुरबाट ल्याइएको इन्जिनियर अधिकारीले जानकारी दिनुभयो ।