दाजुभाईको विवादले धनुषा, महोत्तरी र सिन्धुलीमा पेट्रोलियम पदार्थको हाहाकार

जेठ २८, २०७५ सोमबार १५:४६:१५ | शैलेन्द्र महतो

धनुषा - दाजुभाईको विवादका कारण धनुषा, महोत्तरी र सिन्धुलीमा जिल्लामा पेट्रोलियम पदार्थको हाहाकार भएको छ ।

नेपाल आयल निगम धनुषाको महेन्द्रनगरमा रहेको डिपोबाट तीन दिनदेखि डिजल पेट्रोलको बिलिंग भएको छैन ।

ट्यांकर चालकहरुको भत्ता दिने विषयमा पेट्रोलियम डिलर्स एसोसिएसन जनकपुर र पेट्रोलियम ढुवानी संघ जनकपुरबीच विवाद हुँदा यस्तो अवस्था सृजना भएको हो ।
पेट्रोल पम्प व्यवसायीहरुले ट्यांकर चालकलाई ढुवानी वापत दिँदै आएको ६ सय रुपैयाँ कटौती गरेपछि चालकहरुले ढुवानी सेवा नै बन्द गरेका हुन् ।

गएकाे शुक्रबारदेखि नै डिजेल पेट्रोलकाे बिलिंग नभएपछि पेट्रोल पम्पहरुमा डिजेल पेट्रोलको अभाव भएको हो ।

प्रेट्रोल पम्प व्यवसायीहरुको संस्था पेट्रोलियम डिलर्स एसोसिएसन जनकपुरका अध्यक्ष विष्णुदेव साह छन् । त्यस्तै,पेट्रोलियम पदार्थ ढुवानी गर्ने टयांकर चालकहरुको संगठन पेट्रोलियम ढुवानी संघ जनकपुरको अध्यक्ष उनका आफ्नै जेठा दाई किसुनदेव साह छन् ।

यी दुई संस्थाका अध्यक्ष एवं दाजुभाईबीचको विवादले चालकहरुले ट्यांकर चलाउन बन्द गरेपछि बिलिंग नभएर बजारमा पेट्रोलियम पदार्थको हाहाकार भएको ट्यांकर चालकहरुको संगठन नेपाल टयांकर चालक मजदुर संघ महेन्द्रनगरका अध्यक्ष योगी यादवले प्रतिक्रिया दिनुभयो ।

‘विगतमा लिखित सम्झौता भए अनुसार ९ हजार रुपैयाँ मासिक तलब र प्रति ट्यांकर ढुवानी वापत ६ रुपैयाँ भत्तामा चालकहरुले काम गर्ने गरेका छौं’, ट्यांकर चालकसंघका अध्यक्ष यादवले भन्नुभयो, ‘अब ६ रुपैयाँ भत्ता नै नदिएपछि हामीहरुको घरपरिवार चल्दैन । त्यसैले हामी चालकहरुले ढुवानी बन्द गरेका हाैं । उनीहरु चालक लिएर आउन् र तेल लगुन् । हामी विनाभत्ता ढुवानी गर्दैनौं । ’

यस विषयमा पेट्रोलियम ढुवानी संघ जनकपुरका अध्यक्ष किसुनदेव साहले दाजुभाईमा कुनै विवाद नरहेको दावी गर्नुभयो ।

तर विगतमा चालकहरुलाई दिने गरेको ढुवानी भत्ता कटौती र पेट्रोलियम डिलर्स एसोसिएसनका केही व्यक्तिहरुले तीन जना ट्यांकर चालकलाई गालीगलौज गरेका कारण चालक मजदुरहरुले ढुवानी बन्द गरेको बताउनुभयो ।

तीनजना चालक मजदूरलाई गरेको दुरव्यवहारको विषयमा जिल्ला प्रशासनमा निवेदन समेत परेको उहाँले जानकारी दिनुभयो ।

यता नेपाल आयल निगम महेन्द्रनगरका डिपो प्रमुख मनमोहन साहले ट्यांकर चालकहरुले ढुवानी बन्द गरेकाले गत शुक्रबारदेखि डिजल पेट्रोल बिलिंग नभएको बताउनुभयो ।

उहाँले भन्नुभयो ‘ पेट्रोल पम्पका साहुजीहरुलाई फोन गरी गरेर भनिरहेको छु । चालक लिएर आउनुस् र डिजेल पेट्रोल लग्नुस् ।’

धनुषाको महेन्द्रनगर डिपोबाट धनुषा,महोत्तरी तथा सिन्धुली सहितका तीन जिल्लाहरुमा २ लाख ५० हजार लिटर डिजल तथा १ लाख लिटर पेट्रोल दैनिक रुपमा बिक्रि वितरण हुँदै आएको छ ।

महेन्द्रनगर डिपो अन्तर्गत अहिले झण्डै १ सयको संख्यामा ट्यांकरले तेल आपुर्ति तथा ढुवानी गर्दै आएको छ ।

अन्तिम अपडेट: मंसिर ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

शैलेन्द्र महतो

शैलेन्द्र महतो उज्यालोका धनुषा सहकर्मी हनुहुन्थ्यो।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्