रुकुम पश्चिम – भूकम्पले क्षति पुर्‍याएकाे रुकुम पश्चिमका दुई हजारभन्दा धेरै लाभग्राहीले अझै पहिलो किस्ताको रकम पाउन सकेका छैनन् ।

गएको कात्तिक १७ गते राति जाजरकोटको रामीडाँडा केन्द्रविन्दु बनाएर भूकम्प गएको थियो । तर भूकम्प गएको १० महिना हुन लाग्दा पनि पीडित पहिलो किस्ताकै पर्खाइमा छन् । पहिलो किस्ता पाएका सबै लाभग्राहीले पनि दोस्रो किस्ता पाउन सकेका छैनन् ।

रुकुम पश्चिमका ३२ हजार नौ सय ९६ लाभग्राहीले पहिलो किस्ताबापत २५ हजार रुपैयाँका दरले रकम पाएका छन् । बाँकी दुई हजार दुई लाभग्राहीका लागि पहिलो किस्ताको रकम उपलब्ध नभएको जिल्ला विपद् व्यवस्थापन समितिका संयोजक एवम् प्रमुख जिल्ला अधिकारी हरिप्रसाद पन्तले जानकारी दिनुभयो । रकम प्राधिकरणबाट उपलब्ध हुनुपर्नेमा भएको छैन ।

प्रमुख जिल्ला अधिकारी पन्तकाअनुसार पहिलो किस्ताबापत २५ हजारका दरले ३२ हजार नौ सय ९६ लाभग्राहीले ८२ करोड ४९ लाख रुपैयाँ प्राप्त गरेका छन् ।

जिल्ला विपद् व्यवस्थापनबाट अहिलेसम्म १६ हजार लाभग्राहीका लागि दोस्रो किस्ता स्थानीय विपद् न्यूनीकरण कोषमा पठाए पनि ती सबै लाभग्राहीले दोस्रो किस्ता पाउन सकेका छैनन् । पहिलो किस्ता पाएको लामो समयसम्म पनि दोस्रो किस्ता पाउन नसकेको त्रिवेणी गाउँपालिका–२ का वीरबहादुर ओलीले गुनासो गर्नुभयो । दोस्रो किस्ताबापतको प्रतिपरिवार २५ हजार रुपैयाँका दरले स्थानीय विपद् न्यूनीकरण कोषमा ४० करोड रुपैयाँ जम्मा भएको प्रमुख जिल्ला अधिकारी पन्तले बताउनुभयो ।

दुई वटा पालिका बाँफिकोट र मुसिकोटमा अहिलेसम्म दोस्रो किस्ताबापतको कुनै पनि रकम प्राप्त हुन सकेको छैन । पालिकाले दोस्रो किस्ता माग नगरेकाले रकम पठाउन नसकिएको पन्तको भनाइ छ । दोस्रो किस्ताको रकम आएमा अस्थायी आवासलाई थप व्यवस्थित गर्न सजिलो हुने पीडितले बताएका छन् ।