स्याङ्जा – चापाकोटमा पहिरोले नहर पुरिँदा झन्डै पाँच सय हेक्टर जमिन बाँझो भएको छ । चापाकोट नगरपालिका वडा नम्बर ४ दार्सिङमा रहेको ज्याग्दीखोलामा बाँध बाँधेर २७ किलोमिटर टाढाबाट सिँचाइका लागि पानी ल्याइएको नहर पहिरोले पुरिँदा खेतीयोग्य जमिन बाँझो रहेको हो ।

गएको असार २२ गते पहिराले ठूला ढुङ्गा ल्याएर नहर पुरेको र पहिरो हटाएर पानी सञ्चालन गर्न नसकेको चापाकोट टार सिँचाइ योजना जल उपभोक्ता समितिका अध्यक्ष कृष्णप्रसाद सुवेदीले बताउनुभयो । स्थानीय खोला खोल्साको पानीले भन्डै पाँच सय हेक्टरमा रोपाइँ भए पनि बाँकी पाँच सय हेक्टर बाँझै रहेको उहाँले बताउनुभयो । नहरबाट पानी नआउँदा त्यहाँ रोपाइँ हुनै सक्दैन ।

मान्छेले ढुङ्गा फुटाउन नसकेको र त्यहाँ डोजर लैजान नसकेका कारण ढुङ्गा हटाउन नसकेको नगरपालिकाका मेयर देवबहादुर खाँणले बताउनुभयो । विस्फोटक पदार्थको प्रयोग गरेर ढुङ्गा फुटाउन नेपाली सेनासँग निरन्तर छलफल भइरहे पनि निर्णय भने नभएको उहाँले बताउनुभयो ।

सेनाले ढुङ्गा भएको ठाउँको अनुगनसमेत गरेको र बिस्फोटक पदार्थ लैजान हेलिकोप्टरको प्रयोग अनिवार्य देखिएको छलफल भइरहेको जानकारी गराएको मेयर खाँणले बताउनुभयो । साउन दोस्रो हप्ता शुरु भइसकेकोले रोपाइँ ढिला हुने भन्दै स्थानीय चिन्तित बनेका छन् ।