मनसुन अनुकूल रहँदा धान रोपाइँ बढ्यो, उत्पादन बढ्ने अपेक्षा

साउन १६, २०८१ बुधबार ९:२३:५४ | रासस

काठमाण्डौ – यसवर्ष मनसुन अनुकूल रहँदा अघिल्लो वर्षको तुलनामा धान रोपाइँ बढेको छ । कृषि तथा पशुपक्षी मन्त्रालयकाअनुसार अहिलेसम्म मुलुकभर ९२ दशमलव ४ प्रतिशत रोपाइँ सकिएको छ । जबकि गएको वर्ष यही अवधिसम्म जम्मा ७८ दशमलव १ प्रतिशत रोपाइँ भएको मन्त्रालयको तथ्याङ्कमा उल्लेख छ ।

मन्त्रालयकाअनुसार यस वर्ष १२ लाख ९२ हजार दुई सय २१ दशमलव ६ हेक्टर क्षेत्रफलमा रोपाइँ सकिएको छ । देशभर धान रोपाइँ हुने क्षेत्रफल १३ लाख ९८ हजार दुई सय ७३ हेक्टर रहेको छ ।

तथ्याङ्कअनुसार सबैभन्दा बढी रोपाइँ सुदूरपश्चिममा र कम रोपाइँ मधेस प्रदेशमा भएको छ । पूर्वक्षेत्रमा ढिलोगरी धान राप्ने भएकाले पनि रोपाइँ कम भएको देखिन्छ । सबै प्रदेशमा नै अघिल्लो वर्षको तुलनामा यो वर्ष बढी रोपाइँ भएको छ ।

यस वर्ष कोशी प्रदेशमा ९० दशमलव ७ प्रतिशत, मधेस प्रदेशमा गत वर्ष ५८ दशमलव ८ प्रतिशत, बाग्मती प्रदेशमा ९० दशमलव ८ प्रतिशत, गण्डकी प्रदेशमा ९१ दशमलव ९ प्रतिशत, लुम्बिनी प्रदेशमा ९१ दशमलव ३ प्रतिशत, कर्णाली प्रदेशमा ९६ दशमलव ६ प्रतिशत रर सुदूरपश्चिममा प्रदेशमा ९९ दशमलव ३ प्रतिशत रोपाइँ सकिएको मन्त्रालयले जनाएको छ ।

कृषि तथा पशुपक्षी मन्त्रालयकाअनुसार देशभर झण्डै ५९ प्रतिशत रोपाइँ मनसुनी वर्षाकै भरमा हुने गर्छ । सबै क्षेत्रमा सिँचाइको पहुँच पुग्न नसक्दा ५० प्रतिशतभन्दा बढी रोपाइँ आकाशबाट पर्ने पानीकै भरमा हुने गरेको छ । यसले गर्दा धेरै किसानले आकाशबाट कहिले पानी पर्ला भनेर कुर्नुपर्ने अवस्था रहेको छ ।

कृषि मन्त्रालयका सूचना अधिकृत महानन्द जोशीले यस वर्ष राम्रो वर्षा हुँदा गएको वर्षको तुलनामा धान रोपाइँ राम्रो भएको जानकारी दिनुभयो । उहाँकाअनुसार यस वर्ष शतप्रतिशत नै रोपाइँ हुने अपेक्षा गरिएको छ । समयमा नै रोपाइँ हुँदा यस वर्ष धान उत्पादनमा पनि मन्त्रालयले जनाएको छ । राष्ट्रिय धान अनुसन्धान कार्यक्रमका संयोजक डा.मथुरा यादवले राम्रो वर्षा हुँदा र समयमा नै धान रोपाइँ सकिएमा धानको उत्पादन बढ्ने बताउनुभयो ।

कृषि मन्त्रालयको तथ्याङ्कअनुसार गएको आर्थिक वर्षमा धानको कूल उत्पादन अघिल्लो आर्थिक वर्षभन्दा चार दशमलव ३३ प्रतिशतले वृद्धि भई ५७ लाख २४ हजार २ सय ३४ मेट्रिक टन पुगेको थियो । जुन विगत चार वर्षको औसत उत्पादनको तुलनामा ६ प्रतिशतले बढी हो ।

अन्तिम अपडेट: मंसिर ६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

मनसुन अनुकूल रहँदा धान रोपाइँ बढ्यो, उत्पादन बढ्ने अपेक्षा

फाइल तस्बिर

तपाईको प्रतिक्रिया