अस्वस्थ जीवनशैलीले नसर्ने रोगको जोखिम बढाउँदै

भदौ १९, २०८१ बुधबार ९:१४:५५ | रासस

काठमाण्डौ – अस्वस्थ जीवनशैलीले नसर्ने रोगको जोखिम बढाउँदै लगेको छ । मुख्यगरी अस्वस्थ जीवनशैलीका कारण क्यान्सर, मधुमेह, मुटु, दमजस्ता नसर्ने रोग बढ्दो क्रममा छन् ।

विश्वव्यापीकरण, शहरीकरण, जनसङ्ख्याको वृद्धि, जीवनशैलीमा आएको परिवर्तन तथा वातावरणीय प्रदूषणलगायतका कारणले नसर्ने रोगको जोखिम बढ्दै गइरहेको विज्ञहरु बताउँछन् । मुटु रोग विशेषज्ञ डा.राजेन्द्र कोजु ओपिडीमा आइपुग्ने धेरै जसो बिरामीमा उच्च रक्तचाप, मधुमेह, छाति दुख्ने, मुटुको समस्या देखिन्छ । यी सबै नसर्ने रोग हुन् ।

स्वस्थ खानपान तथा व्यायामले शरीर तन्दुरुस्त हुन्छ भन्ने थाहा भए पनि धेरैले बेवास्ता गर्दै आएको उहाँको अनुभव छ । खानेकुरामा ध्यान दिन नसक्दा विशेषगरी बालबालिकामा पनि मोटोपनको समस्या बढ्दो छ । धेरै चिल्लो र गुलियो खाने तर शारीरिक व्यायाम नहुँदा बोसो जम्ने डा.कोजु बताउनुहुन्छ ।

विश्व स्वास्थ्य सङ्गठन (डब्ल्यूएचओ) का अनुसार नसर्ने रोगबाट वार्षिक चार करोड १० लाखले ज्यान गुमाउने गरेका छन् । विश्व स्वास्थ्य सङ्गठनको सहयोगमा स्वास्थ्य तथा जनसङ्ख्या मन्त्रालय र नेपाल स्वास्थ्य अनुसन्धान परिषद्ले सन् २०१९ मा गरेको एक अध्ययनका अनुसार ७१ प्रतिशतभन्दा धेरै नागरिकले नसर्ने रोगका कारण ज्यान गुमाउनुपरेको छ ।

सूर्तीजन्य पदार्थको प्रयोग, शारीरिक व्यायामको कमी, धुमपान, जाँडरक्सी खाने, अस्वस्थकर खानपान, वायु प्रदूषणले नसर्ने रोग निम्त्याउन भूमिका खेलिरहेका छन् । नसर्ने रोगले लामो अवधि र साधारणयता सुस्त गतिमा प्रभाव पार्ने डाक्टरको भनाइ छ ।

उपचारात्मकभन्दा रोकथाममा नै शुरुमा ध्यान दिन सके नसर्ने रोगबाट बच्न सकिने मधुमेह रोग विशेषज्ञ डा.ज्योति भट्टराई बताउनुहुन्छ । सन्तुलित भोजनको कमी, गुलियो पेयपदार्थले चिनी रोग बढिरहेको देखिन्छ । यसबाट पछि किड्नी फेल, खुट्टा काट्ने अवस्था, हृदयघातजस्ता समस्या आउन सक्छन् । उहाँले नसर्ने रोग लाग्न नदिन विद्यालयस्तरबाट विद्यार्थीलाई सचेत गराउने र अभिभावकलाई पनि जनचेतना प्रदान गर्न आवश्यक रहेको बताउनुभयो ।

नेपालले नसर्ने रोगका कारणले अल्पायुमा ज्यान गुमाउनेको सङ्ख्या सन् २०२५ सम्ममा २५ प्रतिशतले घटाउने लक्ष्य लिएको छ । त्यसैगरी दिगो विकास लक्ष्यले समेत एक तिहाइले नसर्ने रोगका कारणले ज्यान गुमाउनेको सङ्ख्या घटाउने लक्ष्य लिएको छ ।

अन्तिम अपडेट: मंसिर ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

अस्वस्थ जीवनशैलीले नसर्ने रोगको जोखिम बढाउँदै

प्रतीकात्मक तस्बिर

तपाईको प्रतिक्रिया