कञ्चनपुर – सुदूरपश्चिम प्रदेशका ६ जिल्लामा ४ हजार वटा इन्डक्शन चुलो अनुदानमा उपलब्ध गराइने भएको छ । स्वदेशी विद्युतीय ऊर्जाको खपत बढाएर वातावरण सन्तुलित बनाउनका लागि विद्युतीय चुलो प्रवर्द्धन परियोजनाअन्तर्गत सामाजिक चेतना सङ्घ (साडा) संस्थाले चुलो उपलब्ध गराउन लागेको हो ।

संस्थाका कार्यक्रम संयोजक शङ्करदत्त अवस्थीले दार्चुलाको महाकाली, शैल्यशिखर, बैतडीको दशरथचन्द पाटन, डिलाशैनी, बझाङको केदारस्यूँ, जयपृथ्वी, डडेल्धुराको अमरगढी, अजयमेरु, भागेश्वर, परशुराम, गन्यापधुरा, नवदुर्गा, कैलालीको धनगढी, गोदावरी र कञ्चनपुरको भीमदत्त बेदकोट, शुक्लाफाँटा, बेलडाँडीलगायत कार्यक्रम सञ्चालनमा रहेका पालिकामा इन्डक्शन चुलो उपलब्ध गराउन लागिएको जानकारी दिनुभयो । हरेक चुलोको लागत पाँच हजार पर्ने गरेकाेमा दुई हजार एक सय ५० रुपैयाँ रकम अनुदान दिने उहाँले बताउनुभएको छ ।

कार्यक्रम संयोजक अवस्थीले एकल महिला, दलित, सीमान्तकृत तथा विपन्न घरधुरीलाई विपन्नता पहिचानको आधारमा थप अनुदान दिइने पनि बताउनुभएको छ । सुदूरपश्चिम प्रदेशका ग्रामीण क्षेत्रमा अझै पनि ७५ प्रतिशत घरघुरीमा खाना पकाउनका लागि दाउरा, गुइँठा आदिको प्रयोग भइरहेको छ ।