काठमाण्डाै – एभरेस्ट महिला भलिबल लिगमा काठमाण्डौ स्पाइकर्सलाई हराउँदै ललितपुर क्वीन्सले विजयी शुरुआत गरेको छ ।

त्रिपुरेश्वरमा रहेको राष्ट्रिय खेलकुद परिषद्को कभर्ड हलमा आज भएको उद्घाटन खेलमा ललितपुरले काठमाण्डौलाई ३–१ को सेटमा हरायो । पहिलो सेट ललितपुरले २५–२० ले जित्यो । दोस्रो सेट काठमाण्डौले २५–२१ ले जित्यो । त्यसपछि ललितपुरले तेस्रो सेट २५–२१ र चौथो सेट २५–१९ ले जित्यो ।

प्रतियोगितामा आजै दोस्रो खेलमा मधेश युनाइटेड र कर्णाली यश्भिस खेल्दैछन् । यस्तै आजै तेस्रो खेलमा चितवन शक्ति र गण्डकी थन्डर्स खेल्दैछन् । प्रतियोगितामा ६ वटा टोली सहभागी छन् ।

आजदेखि शुरू भएको नेपालको पहिलो फ्रेन्चाइज भलिबल लिग आउँदो शनिवारसम्म चल्नेछ । यस लिगका लागि हरेक टोलीमा १२ खेलाडी छन् । राउन्ड रोबिन लिगका खेलपछि तालिकाको शीर्ष दुई टोलीबीच असोज १९ गते फाइनल खेल हुनेछ ।

तस्वीर : एभरेस्ट महिला भलिबल लिग