काठमाण्डौ – अघिल्लो आर्थिक वर्षको तीन महिनाको तुलनामा चालू आर्थिक वर्षको तीन महिनामा वैदेशिक रोजगारीमा जानेको सङ्ख्या घटेको छ । चालू आर्थिक वर्षको तीन महिना साउन, भदौ र असोजमा वैदेशिक रोजगारीका लागि श्रम स्वीकृत लिनेको सङ्ख्या एक लाख ६२ हजार तीन सय ९४ रहेको छ । यसमा नयाँ कामको खोजीमा म्यानपावरमार्फत रोजगारीका लागि विदेश जानेको सङ्ख्या ८७ हजार सात सय ६३ जना रहेको छ ।

गएको आर्थिक वर्षको साउनदेखि असोजसम्ममा दुई लाख दुई हजार एक सय ४८ जना नेपाली रोजगारीका लागि विदेश गएका थिए । यसैगरी चालू आर्थिक वर्षको तीन महिनामा नेपाल आइ पुनः वैदेशिक रोजगारीका लागि जानेको सङ्ख्या भने ४९ हजार दुई सय ९७ जना रहेको छ ।

चालू आर्थिक वर्षको तीन महिनामा वैदेशिक रोजगारीमा जाने श्रमिकमध्ये २१ हजार दुई सय ४९ जना महिला श्रमिक रहेका छन् । असोज महिनामा ४७ हजार चार सय ४३ पुरुष र छ हजार ८२ जना महिला गरी ५३ हजार पाँच सय २५ नेपाली रोजगारीका लागि विदेश गएका छन् । असोजमा वैदेशिक रोजगारीको लागि धेरै नेपालीहरु खाडीको देश गएका छन् । असोजमा १७ हजार नेपाली युएईमा, १० हजार साउदीमा, नौ हजार सात  सय कतारमा र तीन हजार आठ सय नेपाली कुवेतमा गएका छन् ।