तरकारी खेतीबाट एउटै सिजनमा ६५ हजार आम्दानी: परदेशिएका श्रीमान् फर्किए

बालबालिकाको कुपोषण हट्दै

मंसिर १५, २०७५ शनिबार २०:६:५७ | पुरुषोत्तम गिरी

सल्यान – दार्मा गाउँपालिका–३, डाडागाउँ भल्चौरकी ममिता खत्रीले यो सिजनमा मात्रै तरकारी खेतिबाट ६५ हजार रुपैँया आम्दानी गर्नुभयो ।

दुई वर्ष अघिबाट तरकारी खेती सुरु गरेकी उहाँले यो वर्षयाममा मात्रै ६५ हजार रकम कमाउनुभएको हो । करेला, काँक्रा, साग, काउली बन्दा आदि तरकारी वेचेर उत्साहित बनेकी ममिताले साढे १ रोपनी क्षेत्रफलमा अहिले पनि तरकारी खेती गर्नुभएको छ ।

‘सबै पुरुष विदेश तथा कालापहाड जाने र हामीले घर धान्ने चलनले निर्वाहमुखी खेतीको प्रचलन थियो’ नमुना महिला कृषक समुहकी कोषाध्यक्ष ममिताले भन्नुभयो ‘अहिले त चलन फेरिएको छ, हामी १६ घरले तरकारी खेती गरिरहेका छौं, परदेश गएकाहरु पनि फर्केर तरकारी खेतीमा नै सहयोग गर्न थालेका छन् ।’

उनीहरुले उत्पादन गरेको तरकारी दार्मा गाउँपालिकाको फारुला, दार्माकोट, चम्फुटाकुरा, मौलाहाल्ने लगायतका स्थानिय बजारमा बिक्री हुन्छ । उत्पादित तरकारी यस पटकदेखि गाडिमा जिल्लाबाहिर पठाउने उनीहरुको योजना छ ।

नगद कमाईले परदेशका श्रीमान घर फिर्ता

अहिले नमुना महिला कृषक समुहका २८ सदस्यमध्ये १४ जनाले व्यावसायिक रुपमा तरकारी खेती थालेका छन् । समुहकी अध्यक्ष उषा केसीले भन्नुभया,े ‘मेरो श्रीमान् मलेसिया जानुभयो, अनि फेरी कालापहाड जानुभयो, तर अहिले मैले तरकारी खेती थालेदेखि फर्किनुभएको छ र मलाई सहयोग गर्नुहुन्छ ।’

डाँडागाउमा कुनै बेला एकजना पनि पुरुष गाउँमा नभेटिने गरेकोमा अहिले विदेश तथा कालापहाड गएकाहरु पनि बिस्तारै फर्कँदै छन् । कोषाध्यक्ष ममिता खत्रीले भन्नुभया,े ‘मेरो श्रीमान् पनि एक महिनापछि फर्कँदै हुनुहुन्छ, अब दुवैजना मिलेर थप जमिनमा तरकारी खेती गर्ने योजना छ ।’

सिंचाई कुलो बनेपछि सजिलो

डाँडागाउँमा खेती गरिरहेका १६ घरलाई सिंचाई कुलो बनेपछि तरकारी खेतीमा थप सजिलो भएको छ । सेभ द चिल्ड्रेनसँगको साझेदारीमा दलित विकास समाज सल्यानले सञ्चालन गरेको एकिकृत परियोजनाको साढे २ लाख र महिला समूहको ७० हजार श्रमदानमा यसै वर्ष सिंचाई कुलो बनेको हो ।

एकिकृत परियोजनाले महिलाहरुको समूह गठनदेखि बीउ बिजन, प्लाष्टिक टनेल, प्राविधिक सहयोग, तालिम लगायतका सहयोगसमेत उपलब्ध गराइरहेको अध्यक्ष खत्रीले बताउनुभयो ।

‘सिंचाइ कुलोले सजिलो हुँदा तरकारी खेतीमा थप हौसाएको छ,’ अध्यक्ष खत्रीले भन्नुभयो, ‘समुहका वाँकी सदस्यलाई पनि समेट्ने योजनामा छौँ । ’

बालबालिकाको कुपोषण हट्दै

महिलाहरुले तरकारी खेती गर्न थालेपछि खानपानमा समेत यसले सजिलो बनाएको समूहका सदस्यहरुको अनुभव छ ।

डेढ वर्ष अघि सन्तुलित खानेकुरा नखाँदा २ वर्षको कुपोषित बच्चाको पोषण पुर्नस्थापना केन्द्रमा उपचार गर्नुपरेको समूहकी सचिव सविता केसीले बताउनुभयो ।
‘हरेक दिन हरिया सागपातसहितको खानेकुरा भान्सामा पाक्छ,’ समूहकी सचिव केसीले भन्नुभयाे, ‘अहिले त गाउँमा कोही पनि बालबालिका कुपोषित छैनन् । विद्यालयमा पनि घरमै बनेको खाजा पठाउछौँ ।’

अन्तिम अपडेट: मंसिर १२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

पुरुषोत्तम गिरी

पुरुषोत्तम गिरी सल्यानका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्