त्रिभुवन विश्वविद्यालयको ५०औं दीक्षान्त समारोह आज, सर्वोत्कृष्ट पदक पाउनेमा छात्रा बढी

पुष १३, २०८१ शनिबार ८:३६:२१ | उज्यालो सहकर्मी

काठमाण्डाै – त्रिभुवन विश्वविद्यालयले आज ५०औं दीक्षान्त समारोह मनाउँदैछ । यस वर्ष दीक्षान्त समारोहको ५० वर्ष पुगेकाले स्वर्ण महोत्सवका रूपमा मनाउन लागिएको त्रिवि परीक्षा नियन्त्रण कार्यालयका परीक्षा नियन्त्रक पुष्पराज जोशीले जानकारी दिनुभयो ।

त्रिपुरेश्वरको दशरथ रङ्गशालामा हुने दीक्षान्त समारोहमा यस पटक १४ हजार तीन सय आठ जना विद्यार्थी दीक्षित हुँदैछन् । गएको वर्षभन्दा यस पटक दुई हजार जनाभन्दा धेरै विद्यार्थी दीक्षित हुन लागेका परीक्षा नियन्त्रक जोशीले जानकारी दिनुभयो ।

स्नातकतर्फ नौ हजार ६८, स्नातकोत्तरतर्फ पाँच हजार ५५, एमफिलतर्फ ६३ र विद्यावारिधि (पीएचडी) तर्फ एक सय २२ जना विद्यार्थी दीक्षित हुँदैछन् । सर्वाेत्कृष्ट नतिजा ल्याउने २२ जना विद्यार्थीलाई पदक र पुरस्कार प्रदान गरिँदैछ । पदक र पुरस्कार पाउनेमा छात्रभन्दा छात्राको सङ्ख्या बढी छ । २२ पदक र पुरस्कारमध्ये १७ वटा छात्रा र पाँच वटा छात्रले पाउने त्रिविले जनाएको छ ।

दीक्षान्त समारोहमा सहभागी हुनेहरूका गाडी पार्किङका लागि विभिन्न तीन ठाउँ तोकिएका छन् । विद्यार्थी र अभिभावकहरूका गाडी सैनिक मञ्च टुँडिखेल तथा अतिथि, शिक्षक कर्मचारीहरूका गाडी परराष्ट्र मन्त्रालयको कन्सुलर शाखा कार्यालयको हाताभित्र र शिक्षक कर्मचारीका गाडी वर्ल्ड ट्रेड सेन्टरको पार्किङ स्थलमा व्यवस्था गरिएको छ ।

देशकै जेठो त्रिभुवन विश्वविद्यालयमा दीक्षित हुने विद्यार्थीको सङ्ख्या बढ्दै गएपछि अर्को वर्षदेखि समारोहको विधि परिवर्तन गर्ने त्रिविले जनाएको छ । अब ६/६ महिनामा वा सङ्कायगत रूपमा समारोह आयोजना गर्ने निर्णय भएको त्रिविले जनाएको छ ।

त्रिविमा चार लाख ५० हजार जनाभन्दा धेरै विद्यार्थी अध्ययनरत छन् । व्यवस्थापन, मानविकी, कानून र शिक्षा गरी चार वटा सङ्काय तथा चिकित्सा शिक्षा, इन्जिनियरिङ, कृषि तथा पशु, वनविज्ञान र विज्ञान प्रविधि गरी पाँच वटा अध्ययन संस्थानबाट गरी यस वर्ष ७४ हजार जना विद्यार्थी उत्तीर्ण भएका छन् ।

अन्तिम अपडेट: पुस १३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्