वन डढेलो फैलने क्रम तीव्र, तीन महिनामै एक हजार आठ सयभन्दा धेरै डढेलो

चैत २७, २०८१ बुधबार ९:४:५२ | उज्यालो सहकर्मी

काठमाण्डौ – हिजो एकैदिन देशका ५२ ठाउँमा डढेलो लागेको छ । चितवनमा मात्रै १० ठाउँमा डढेलो लागेको नेपाल फरेस्ट फायर म्यानेजमेन्टको तथ्याङ्क छ ।

पछिल्ला हप्ताहरुमा डढेलो तीव्र रुपमा फैलिरहेको छ । वन तथा भूसंरक्षण विभागको डढेलो पहिचान तथा अनुगमन प्रणालीका अनुसार अप्रिल महिना शुरू भएयताको एक हप्तामा मात्रै देशका ६२ जिल्लाका ८ सय ८५ ठाउँमा डढेलो लागेको छ ।

सन् २०२४ नेपालमा धेरै डढेलो लाग्ने वर्ष बनेको थियो । तर यो वर्ष त्यो भन्दा पनि बढेको छ । गएको वर्ष जनवरी १ तारिखदेखि अप्रिल ७ तारिखसम्म एक हजार ४० ठाउँमा डढेलो लागेकोमा यो वर्ष त्यही अवधिमा एक हजार आठ सय ४२ ठाउँमा डढेलो लागेको छ ।

यसले गएको वर्षका तुलनामा यस वर्ष ७७ प्रतिशत बढी ठाउँमा डढेलो लागेको देखाउँछ । सामान्यतया धेरै डढेलो लागेको अर्को वर्ष वनमा इन्धन कम हुने भएकोले डढेलो कम लाग्नुपर्नेमा हरेक वर्ष बढ्नु चिन्ताजनक अवस्था रहेको डढेलो विज्ञ कृष्ण भुजेल बताउनु हुन्छ ।

यस वर्ष पनि हिउँद सुक्खा भएको र प्रिमनसुन अवधिमा पनि पानी नपर्दा सुक्खा बढेर डढेलो बढ्न मद्दत पुगेको वन तथा भूसंरक्षण विभागका उपमहानिर्देशक धनन्जय लामिछानेले बताउनुभयो ।

सरकारले डढेलो लाग्न नदिने काम गर्न उदासिनता देखाएको छ भने निभाउनका लागि उपकरण नै नभएको वन तथा वातारण मन्त्री ऐनबहादुर शाही ठकुरीले सार्वजनिक कार्यक्रममै बताउनुभएको छ । सरकार डढेलो निभ्न पानी पर्नु पर्ने आशामा छ ।

बसाइँ–सराइ तथा जग्गा बाँझो हुने क्रमले गर्दा वनमा सुकेका काठपात थुप्रने क्रम बढेको छ । इन्धन बढी हुँदा डढेलो फैलने क्रम बढेको छ । यस्तै मिचाहा प्रजातिका वनस्पतीको फैलावटले पनि डढेलो बढाउन भूमिका खेलेको छ ।

नेपालमा हुने डढेलोको ९७ प्रतिशत भन्दा धेरै मानवीय कारणबाट हुने गरेको छ । तर सरकारले यसलाई रोक्न सकेको छैन । डढेलोले हावामा प्रदूषण बढाएर निसासिने अवस्था आएको छ भने जङ्गलमा जैविक विविधता पनि नष्ट भइरहेको छ ।

अन्तिम अपडेट: बैशाख ४, २०८२

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्