दाङ –  दाङको विकट पहाडी क्षेत्र बंगलाचुली गाउँपालिका—८, गुरासेका अग्निपीडित नवराज पुनको परिवारलाई ६ लाख रुपैयाँ राहत प्रदान गरिएको छ ।

नवराजको परिवारलाई प्रदेश र जिल्ला विपद् व्यवस्थापन समितिबाट राहत प्रदान गरिएको हो ।

आन्तरिक मामिला तथा कानुन मन्त्रालयको तीन लाख र जिल्ला दैवी उद्धार समितिको तीन गरी ६ लाख रुपैयाँ जिल्ला प्रशासन कार्यालय दाङ मार्फत प्रदान गरिएको हो । प्रदेश ५ का आन्तरिक मामिला तथा कानुनमन्त्री कुलप्रसाद केसीले अग्निपीडित नवराज पुनलाई तीन/तीन लाखको चेक हस्तान्तरण गर्नुभएको थियो ।

मंसिर २७ गते बेलुकी घरमा आगलागी हुँदा पुनका दुई छोरी र एक छोराको जलेर ज्यान गएको थियो ।

प्रदेश सरकार र जिल्ला विपद् व्यवस्थापन समितिले प्रति व्यक्ति एक लाखका दरले ६ लाख राहत उपलब्ध गराएको प्रमुख जिल्ला अधिकारी गोविन्द रिजालले जानकारी दिनुभयो  । यस्तै अग्निपीडित पुनलाइ घर निर्माणका लागि ४० हजार रुपैयाँ सहयोग गर्ने पनि प्रमुख जिल्ला अधिकारी रिजालले बताउनु भयो  ।