सरकारी भवन अलपत्र छाडेर भाडामा वडा कार्यालय सञ्चालन !

माघ १, २०७५ मंगलबार १६:४०:५८ | मुना हमाल

सुर्खेत – सुर्खेतको बराहताल गाउँपालिका वडा नम्बर २ ले सरकारी भवन छोडेर भाडाको घरमा कार्यालय सञ्चालन गर्दै आएको छ ।

अन्य टोलहरुलाई पायक नपर्ने भन्दै वडा कार्यालयले वडा नम्बर २ मै पर्ने रानिघाटमा भएको भवनलाई छोडेर भाडामा कार्यालय सञ्चालन गरेको हो । पाँच कोठे भवन अहिले बेवारिसे अवस्थामा छ ।

वडा कार्यालयकाे नयाँ भवन

स्थानीय र केही जनप्रतिनिधिहरुको विरोध भएपनि अन्य क्षेत्रका लागि पायक नपर्ने भन्दै थापाडेरा वडा कार्यालय सारिएकोे हो । गएको मंसिर २९ गते रानिघाटबाट वडा कार्यालयलाई थापा डेरा सारिएको हो । अलपत्र परेको भवनमा पशुसेवा इकाई लेखेको बोर्ड मात्र झुड्याइएको छ ।

वडा कार्यालय भाडाको घरमा अहिले कर कटाएर महिनाको पाँच हजार रुपैयाँ भाडा तिर्दै आइरहेको छ । कर कटाएर वार्षिक ६० हजार घर भाडामा मात्र खर्च हुन्छ । सरकारी भवन हुँदाहुँदै पनि भाडामा कार्यालय सञ्चालन गरेको भन्दै स्थानीयले गुनासो गरेका छन् ।

खाली सरकारी भवन

थापा डेराबाट रानिघाट जाँदा भेरीमा रहेको झुलुङ्गे पुल तरेर जानुपथ्यौँ । ‘भेरी नदीको पुल तरेर वारी रानिघाट आउन धेरै समय लाग्दैन । त्यस्तै १० देखि १५ मिनेटसम्म लाग्छ । हामीले हाम्रो टोलमा ‘वडा कार्यालय भएन्’ भनेर पनि विरोध गरेका होइन’, स्थानीय कबिराज थापाले भन्नुभयो, ‘अहिले महंगो भाडा तिरेर वडा कार्यालय सञ्चालन भइरहेको छ । हाम्रो यस प्रति मात्र गुनासो हो ।’

पहिले वडा कार्यालय भएको सरकारी भवनमा स्वास्थ्य चौकी, भेरी माध्यमिक विद्यालय छ । स्थानीय डिलबहादुर पुलामीले स्वास्थ्य चौकी, विद्यालय पुरानै ठाउँमा भएकाले प्रायः सेवा लिन रानिघाट आउनुपर्ने भएकाले भाडामा वडा कार्यालय मात्र संचालन गर्न नहुने बताउनुभयो ।

पहिलाको वडा कार्यालय भएको भवन नजिक बस्ती भएकाले त्यो जग्गा एलानी भएकाले अरुले हड्प्न सक्ने स्थानीयको भनाई छ । पहिला वडा कार्यालय सरकारी भवनमा नै सञ्चालन गर्ने भनेर दुईजना वडा सदस्यले भाडाको घरमा सञ्चालन गर्न मानेका थिएन् । दुईजना सदस्य र वडा अध्यक्षले पारि सार्ने भनेपछि पारि सारिएको हो ।

‘पहिला सरकारी कार्यालयमा नै सञ्चालन गर्ने भनेर मसहित अर्को एकजना वडा सदस्यले मानेका थिएनौँ’, वडा सदस्य दुर्गा बिष्टले भन्नुभयो, ‘अब जसरी पनि नागरिकलाई सेवा नै दिने हो भन्ने सोचेर हामीले भाडाको घरमा कार्यालय सञ्चालन गर्न सहमति जनाइयौँ ।’

यता वडा अध्यक्ष युवाराज कार्कीले सबै नागरिकलाई पायक पर्ने ठाउँ भएकाले वारि वडा कार्यालय सारिएको जानकारी दिनुभयो । आफ्नो ठाउँमा वडा कार्यालय नभएकाले विरोध गर्नु स्वभाविक भएको भन्दै उहाँले पम्का र डोप्काका नागरिक र रानिघाटका नागरिक दुवैलाई पायक पर्ने ठाउँमा वडा कार्यालय सारिएको बताउनुभयो ।

‘वडा कार्यालय टाढा भयो भनेर जनगुनासो बढेपछि म बाध्य भएर वडा कार्यालय सारेको हुँ’, उहाँले भन्नुभयो, ‘त्यो भवन स्वास्थ्यको पनि हो । गाउँपालिकाको निर्णयले पाँच हजार भाडा दिने भनेर भनेका छौँ । त्यो भवन अब मर्मत गरेर केही व्यवस्था गर्ने निर्णय भएको छ ।’

अन्तिम अपडेट: मंसिर ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

मुना हमाल

मुना हमाल सुर्खेतका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्