गाउँपालिकाको गाडी प्रहरी चौकीमा !

माघ २५, २०७५ शुक्रबार ८:३५:११ | सुजता सुनुवार

इलाम – इलामको फाकफोकथुम गाउँपालिकाका लागि खरिद गरिएको दुई सवारी साधन आमचोक प्रहरी चौकीमा राखिएको छ ।

किनेका गाडी कसले प्रयोग गर्ने भन्ने पक्षमा अध्यक्ष राम श्रेष्ठ र उपाध्यक्ष सरस्वती राईबीच गएको माघ २० गते तीव्र असमझदारी बढेपछि ती गाडी चौकीमा राखिएका हुन् । चौकीमा गाडी थन्किएपछि अहिले गाउँपालिका अध्यक्ष र उपाध्यक्ष कार्यालयकै काममा समेत सार्वजनिक सवारी प्रयोग गर्न बाध्य भएका छन् ।

गाउँपालिकाको विकासको बजेटलाई कटौती गरेरै गएको मसिंरमा बोलेरो गाडी किनिएको थियो । मे १ झ १७१ नम्बरको बोलेरो गाडी र यसअघि उपाध्यक्षका लागि भनेर गाउँपालिकाबाट खरिद गरिएको मे १ ब ६७७ नम्बरको १५० सीसीको यामाहाको एफजेड मोटरसाइकल प्रहरी चौकीमा राखिएको गाउँपालिकाले जनाएको छ ।

माघमा विराटनगरमा हुने कार्यक्रममा गाउँपालिकाबाट प्रतिनिधित्व गरेर जान उपाध्यक्षले गाडी माग्दा प्रमुखले नदिएपछि विवादले उग्र रुप लिएको बताइएको छ ।

उपाध्यक्ष राईका अनुसार गाडी माग्दा अध्यक्ष श्रेष्ठले वडा नम्बर–७, को एकतप्पामा सुरु हुने फुटबल प्रतियोगिता उद्घाटन कार्यक्रममा जानुपर्ने भएकाले गाडी खाली नहुने बताउनु भएको थियो । उहाँले भन्नुभयो, ‘राँकेसम्म मात्रै भए पनि गाडी लान्छुभन्दा अध्यक्ष श्रेष्ठले ‘मेरो गाडी दिन्न’ भनेर आफ्नै निजी गाडी भएजस्तै गर्नु भएकोले विवाद लम्बिँदै गएको हो । पटक–पटक वादविवाद गरिरहनुभन्दा गाडी नै थन्क्याइदिउँ भनेर प्रस्ताव राखेकी हूँ’, उपाध्यक्ष राईले बताउनुभयो ।

यता अध्यक्ष श्रेष्ठले भने गाडी दिन्न नभनेको र खाली भएका बेला गाडी उपाध्यक्षले पनि प्रयोग गरिरहेको बताउनु भएको छ । अध्यक्ष राईले भन्नु भयो, ‘मेरो एक÷दुई दिन समय खाली छैन मात्र भनेको हूँ । ‘खाली भएका बेला गाडी दिएकै छु ।’ तर उपाध्यक्ष राईले गाडीमा चढ्न नै पाइनँ भनेपछि कार्यविधि नबनुञ्जेल कसैले नचालाउने भन्दै भद्र मौखिक सहमति गरी गाडी चौकीमा राखिएको उहाँको भनाई छ ।

गाउँपालिकाबाट सवारी साधन प्रयोगसम्बन्धी कार्यविधि नबनेसम्म गाडी सुरक्षित रुपमा राख्ने भन्ने सहमतिपछि गाडी चौकीमा राखिएको गाउँपालिकाले जनाएको छ । गाउँपालिकाको विधेयक समितिले कार्यविधि तयार गरेर अर्को बैठकमा पेश गर्नेछ । त्यो विधेयक पारित गरेर लागू नभएसम्म गाडी चौकीमा नै रहनेछ ।

त्यस अवधिसम्म गाडी रिजर्भ गरेर वा सार्वजपनिक गाडीको यात्राको बील कार्यालयले नव्यहोर्ने भनेर प्रमुख श्रेष्ठ र उपप्रमुख राईबीच ‘भद्र’ सहमति भएको छ । यो सहमति भने मौखिक रहेको छ ।

यी दुई सवारी चौकीमा राखिए पनि यसअघि भएका वडा कार्यालयहरुमा चलिरहेको र अन्य कर्मचारीले चलाएका मोटरसाइकल भने यथावत चलाइएका छन् ।

अन्तिम अपडेट: मंसिर ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

सुजता सुनुवार

सुजता सुनुवार उज्यालोमा कार्यरत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्