फेरियो प्रधानमन्त्री ओलीको बोली : कुनै पनि सार्वभौम देशमाथि विदेशी हस्तक्षेप अमान्य

फागुन १, २०७५ बुधबार १५:२९:१५ | उज्यालो सहकर्मी

काठमाण्डौ – प्रधानमन्त्री केपी शर्मा ओलीले अन्तर्राष्ट्रिय सम्बन्ध बिगार्न खुबै प्रयास भइरहे पनि त्यस्तो प्रयास सफल नहुने स्पष्ट पार्नुभयो ।

बुधबार प्रधानमन्त्री रोजगार कार्यक्रमको औपचारिक उद्घाटन गर्नुहुँदै प्रधानमन्त्री ओलीले सार्वभौम र स्वतन्त्र देश नेपालको अन्तर्राष्टिय सम्बन्ध बिगार्न खोज्ने कसैको प्रयास पनि सफल नहुने दाबी गर्नुभयो ।

नेपालको परराष्ट्र नीति स्पष्ट र पारदर्शी रहेको भन्दै उहाँले पारदर्शी ढंगले नै अन्तर्राष्ट्रिय मञ्च र छिमेकी देशसँगको सम्बन्ध कायम रहेको पनि बताउनुभयो ।

नेपाल कम्युनिष्ट पार्टीका अध्यक्षसमेत रहनुभएका प्रधानमन्त्री ओलीले कहीँ कतै कुनै देशमा आन्तरिक समस्या रहेको छ भने त्यो देशको समस्या त्यहीँका नागरिकले समाधान गर्ने भन्दै त्यसमा बाह्य हस्तक्षेप हुनु उचित नहुने बताउनुभयो ।

भेनेजुएलामा अमेरिकी हस्तक्षेपको विषयतर्फ इंगित गर्दै उहाँले नेपाल संयुक्त राष्ट्रसंघको बडापत्र र पञ्चशीलको सिद्धान्तअनुरुप अघि बढेको पनि प्रष्ट पार्नुभयो ।

यसअघि नेपाल कम्युनिष्ट पार्टीका अर्का अध्यक्ष पुष्पकमल दाहाल प्रचण्डले भेनेजुएलामा अमेरिकाले हस्तक्षेप गरेको भन्दै त्यसको कडा शब्दमा विरोध जनाउनुभएको थियो ।

केही दिनअघि एक कार्यक्रममा प्रधानमन्त्री ओलीले भने भेनेजुएला सम्बन्धमा प्रचण्डको जिब्रो चिप्लिएको हुन सक्ने भन्दै अमेरिकी हस्तक्षेपको समर्थनमा बोल्नुभएको थियो । प्रचण्डको भनाइ सार्वजनिक भएसँगै अमेरिकाले सरकारको धारणा माग गरेको थियो ।

तर बुधबार संयुक्त राष्ट्रसंघको बडापत्र र पञ्चशीलको सिद्धान्तअनुरुप नेपालको विदेश नीति यथावत रहेको भन्दै कुनै देशको समस्यामा बाहिरी देशको हस्तक्षेप हुनु उचित नहुने बताउनुले प्रधानमन्त्री ओलीको बोली फेरिएको देखिएको छ ।

पछिल्लो समय एक अध्यक्ष प्रचण्डले सरकार मनलाग्दी रुपमा हिँडेको भन्दै अर्को माओवादी जन्मन सक्ने भनेर चेतावनी दिनु र यही बेला प्रधानमन्त्री ओलीको बोली फेरिएर प्रचण्डले भनेकै कुरामा सहमति जनाउनुलाई उनलाई फकाउने रुपमा आएको कतिपयले विश्लेषण गरेका छन् ।

नेपालको कसैसँग दुश्मनी नरहेको भन्दै उहाँले अन्तर्राष्ट्रिय सम्बन्धमा खेलेर फाइदा लिन खोज्ने प्रवृत्ति त्याग्न आग्रह गर्नुभयो । छिमेकीसँग होस वा अन्य देशसँग कसैले कुनै प्रकारको असमझदारी बढाउने प्रयास गर्छु भन्यो भने त्यो प्रयास सफल नहुने बताउनुभयो ।

असमझदारी बढाएर फाइदा लिन्छु भन्ने बुद्धि अब देश विकासमा लगाउन आग्रह गर्दै उहाँले यस्ता कुरामा लाग्नु भनेको समयको बर्बादी मात्रै हो भन्नुभयो ।

अन्तिम अपडेट: पुस १३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्