काठमाण्डौ – स्वास्थ्य क्षेत्रको कर्मचारी समायोजनमा असन्तुष्टि जनाउँदै सरकारी स्वास्थ्य संस्थामा कार्यरत डाक्टरले आकस्मिक बाहेकको स्वास्थ्य सेवा बन्द गराएका छन् । 

सबै प्रदेशमा समान तरिकाले डाक्टर खटाएर समायोजन गर्नुपर्ने आफ्नो माग सरकारले सुनुवाई नगरेपछि शुक्रबारदेखि सरकारी स्वास्थ्य संस्थामा आकस्मिक बाहेकको सेवा बन्द गराएको सरकारी चिकित्सक संघ (गोदान)का अध्यक्ष दीपेन्द्र पाण्डेले जानकारी दिनुभयो । 

गएको फागुन १८ गते गोदान र प्रधानमन्त्री केपी शर्मा ओलीबीच सबै प्रदेशसमा समान तरिकाले डाक्टर पठाउने सहमति भए पनि ब्यवहारमा त्यस्तो नभएको अध्यक्ष पाण्डेले जानकारी दिनुभयो ।

आफ्नो माग पूरा नहुँदासम्म आकस्मिक बाहेकका सेवा बहिष्कार गर्ने संघले जनाएको छ ।  देशभर झण्डै १४ सय सरकारी डाक्टर छन् । सरकारी डाक्टरले आ–आफ्नो स्वास्थ्य संस्थामा दबाबमुलक कार्यक्रम सञ्चालन गर्ने पनि जनाएका छन् । 

यसअघि संकलन गरिएका राजीनामा पत्रसमेत सरकारलाई बुझाउने उनीहरूको कार्यक्रम छ । सरकारी चिकित्सकको आन्दोलनका कारण विरामीलाई भने समस्या भएको छ ।