सोलुखुम्बु – खुम्बु क्षेत्रमा एक स्पेनिस नागरिकको ज्यान गएको छ । खुम्बु पासङल्हामु गाउँपालिका–५ लुङदेमा गएको आइतबार बिहान ९ बजे लेक लागेर एकजना पुरुष स्पेनिस नागरिक अलबेटोको ज्यान गएको हो । 

लुक्लाबाट ७ जनाको टोली आधारशिविरतर्फ जाँदै गर्दा बाटैमा बिरामी परेका उनलार्ई थ्रिपास गेस्ट हाउसमा लगिएको थियो । उनको त्यही गेस्ट हाउसमा नै ज्यान गएको प्रहरीले जनाएको छ ।

एसियन एड्भेन्चर एक्सपेडिसन ट्रेक्स प्रालिमार्फत नेपाल भ्रमणमा आएका ७ जना विदेशी नागरिक मध्ये अलबेटोको ज्यान गएको जिल्ला प्रहरी कार्यालय सोलुखुम्बुले पुष्टि गरेको छ । 

घटनास्थलतर्फ इलाका प्रहरी कार्यालय नाम्चेबाट प्रहरी निरीक्षक सहितको टोली प्रस्थान गरेको जिल्ला प्रहरी कार्यालयले जनाएको छ । घटनास्थल इलाका प्रहरी कार्यालय नाम्चेबाट करिब १२ घण्टाको पैदल दूरीमा पर्दछ ।