इंग्लिस फुटबल खेलाडी तथा एभर्टनका स्ट्राइकर वायन रुनीले अमेरिकी फुटबल लिग मेजर सकर लिगमा अनुबन्धित भएका छन् । उनी अमेरिकी क्लब डीसी युनाइटेडमा अनुबन्धित भएका हुन् । 

रुनीको आधिकारिक रुपमा भने अमेरिकी लिगको आउँदो १० जुलाईबाट मिड–सिजन ट्रान्सफर सुरु भएपछि मात्रै अनुबन्धित हुनेछन् । ३२ वर्षीय रुनीले डीसी युनाइटेडसँग १० मिलियन पाउण्डमा सम्झौता गरेका हुन् । 

म्यानचेस्टर युनाइटेडका पूर्व कप्तानसमेत रहेका रुनीले डीसीबाट पहिलो खेल आउँदो जुलाई १४ मा भ्यानकुभर ह्वाइटक्याप्सविरुद्ध खेल्नेछन् । 

#NoWayneNoGain pic.twitter.com/HfbLmCsBOq

— D.C. United (@dcunited) June 28, 2018

रुनी डीसी युनाइटेडमा पनि ९ नम्बर जर्सीमै खेल्ने छन् । डीसीले आफ्नो क्लबको ९ नम्बरको जर्सीमा रहेका रुनीको भिडियोसमेत सार्वजनिक गरेको छ । वाशिंगटन पोष्टका अनुसार डीसीमा हालसम्मकै सर्वाधिक रकममा सम्झौता गर्ने खेलाडी बनेका छन् । 

१८ वर्षको उमेरमै रुनी सन् २००४ मा म्यानचेस्टर युनाइटेडमा २५ मिलियन पाउण्डमा अनुबन्धित भएका थिए । उनले युनाइटेडका लागि ५५९ खेलमा २५३ गोल गरेका छन् । साथै क्लबलाई पाँच पटक युनाइटेडलाई प्रिमियर लिगको उपाधि जिताएका छन् । 

रुनीले इंग्ल्याण्डको राष्ट्रिय टिमबाट ११९ खेलमा ५३ गोल गरेका छन् । रुनी गएको वर्षमात्रै आफ्नो बाल्यकालको क्लब एभर्टनमा आवद्ध भएका थिए । उनले एभर्टनबाट ४० खेलमा ११ गोल गरेका थिए । गत सिजनको प्रिमियर लिगमा एभर्टनले आठौं स्थान हासिल गरेको थियो ।