यूएईमा १२ जना नेपाली अलपत्र

जेठ १, २०७६ बुधबार १३:३४:३३ | उमाकान्त पाण्डे

काठमाण्डौ – संयुक्त अरब इमिरेट्स (यूएई) मा १२ जना नेपाली अलपत्र परेका छन् । साढे २ महिनादेखि तलब नपाएपछि उनीहरु अलपत्र परेका हुन ।

अलपत्र पर्नेमा अर्घाखाँचीका हरिप्रसाद गैरे, मोरङका सानु राई, सन्तोष गुरुङ र लालध्वज राई, काभ्रेका बोमबहादुर तामाङ, नवलपुरका गया चौधरी र सुनसरीका इन्द्रबहादुर महतो रहेका छन् ।

काठमाण्डौ महाराजगञ्जमा रहेको नेगी इन्टरनेशनल ओभरसिज म्यानपावरमार्फत यूएईको एटोन कन्ट्र्याक्टिङ मेन्टिनेन्स् कम्पनीमा आएका उनीहरुलाई तलब नपाएपछि खाना र बस्न पनि समस्या परेको छ ।

समस्यामा परेका १२ जनामध्ये १ जना मात्रै कम्पनीमा साढे दुई महिना पहिले यूएई आएको भए पनि बाँकी भने कम्पनीमा ९ महिना पहिलेदेखि कम्पनीमा कार्यरत थिए ।

पहिलेदेखि काम गरेको तलब नपाएपछि उनीहरुले काम छोडेर कम्पनीको क्याम्पमा बसेको र अहिले कम्पनीले भाडामा लिएर राखेको मजदुर क्याम्पबाट पनि निकालेपछि थप समस्यामा परेका हुन् ।

आबुधाबीको मुसाफा ८ नम्बर मजदुर क्याम्पमा ७ जना र बाँकी ५ जना दुबईमा समस्यामा परेको छन् । मुसाफामा अलपत्र परेका ७ जनाले मंगलबार नेपाली दूतावास आबुधाबीमा पुगेर आफूहरु समस्यामा परेको र सहयोग गरिदिन भन्दै निवेदन समेत दिएका छन ।

सोही कम्पनीमार्फत दुबईमा कार्यरत बाँकी ५ जना दूतावाससम्म आउने जाने पैसा नभएकाले निवेदन दिनसमेत आउन नसकेको पीडितमध्येका एक मोरङका शिशिर राईले बताउनुभयो ।

अलपत्र परेकामध्ये सबै इलेक्ट्रिसियन तथा प्लम्बरको काममा यूएई आएका हुन् । काम एउटै भए पनि म्यानपावरले नेपालमा गराएको सम्झौता अनुसार यहाँ तलब नपाएको पीडितहरुको गुनासो छ ।

एक हजार दिर्हाम न्युनतम तलब र खाना बापत २ सय दिर्हाम दिने भनेर यूएई ल्याएको भए पनि यहाँ आएर कम्पनीले ८ सय तलब र २ सय खाना बापतको सम्झौता गराएको थियो ।

तर पछिल्लो साढे दुई महिना यता तलब नपाएपछि अहिले उधारोमा सामान ल्याएर गुजारा गरिरहेको पीडित सानु राइले बताउनुभयो । पीडितहरुमध्ये कतिपयको मासिक तलब बाहेक ३ देखि ६ महिनासम्मको ओभरटाइमको हिसाबसमेत कम्पनीले नदिएको अर्घाखाँचीका हरिप्रसाद गैरेले दुखेसो गर्नुभयो ।

‘कम्पनीले काममा लगाएको ठाउँबाट पैसा नआएको भन्दै तलब दिएको छैन, हामीलाई खान बस्नसमेत समस्या भएको छ,’ सन्तोष गुरुङले भन्नुभयो । तलब नपाएपछि दुई हप्तादेखि काममा नगएको र आफूहरुले पाउनुपर्ने रकम दिलाएर नेपाल फर्काउन दूतावासलाई अनुरोध गरेको पीडितको भनाई छ ।

नेपाली कामदारको उजुरीका आधारमा दूतावासका श्रम काउन्सिलर भेषबहादुर कार्कीले कम्पनीको मानव संसाधन विभाग र म्यानपावरका प्रतिनिधिसँग टेलिफोन गरेर समस्या समाधान गर्न आग्रह गरिएको जानकारी दिनुभयो ।

कम्पनीले एक हप्तामा कामदारहरुले पाउनुपर्ने सम्पूर्ण सेवा सुविधा उपलब्ध गराउने प्रतिवद्धता दूतावाससँग गरेको छ । उनीहरुको समस्या समाधान गर्ने र खाना बस्नको समेत व्यवस्था गर्ने कम्पनीले मौखिक सहमति जनाएको काउन्सिलर कार्कीले बताउनुभयो ।

यस्तै कामदार यूएई पठाएको म्यानपावर कम्पनीले पनि कामदार कार्यरत कम्पनीसँग समन्वय गरेर समस्या समाधान गर्ने बताएको दूतावासले जनाएको छ ।

अन्तिम अपडेट: मंसिर ९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

उमाकान्त पाण्डे

उज्यालाे सहकर्मी उमाकान्त पाण्डे युएईमा बसेर पत्रकारिता गर्नुहुन्छ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्