कैलाली र कञ्चनपुरमा भीषण हावाहुरी : एक जनाको मृत्यु, ४० जनाभन्दा धेरै घाइते

 जेठ २४, २०७६ शुक्रबार ६:१८:३४ | उज्यालो सहकर्मी
unn.prixa.net

काठमाण्डौ - बिहीबार बेलुकीको भीषण हावाहुरीबाट कैलालीमा एकजनाको ज्यान गएको छ ।

गोदावरी नगरपालिकामा एकजनाको ज्यान गएको प्रहरीले जनाएको छ । कैलालीमा अरु २५ जना घाइते भएका छन् । घाइतेहरुको सेती अञ्चल अस्पताल लगायत अरु स्थानीय अस्पतालमा उपचार भैरहेको छ । 

कञ्चनपुरमा पनि हावाहुरीबाट २० जना भन्दा धेरै घाइते भएका छन् । घाइतेहरुको महाकाली अञ्चल अस्पतालमा उपचार भैरहेको प्रहरीले जनाएको छ । हावाहुरीले बिजुलीको पोल तथा रुख ढलाउँदा केही ठाउँमा यातायात अवरुद्ध भएको छ । कच्ची घरका छाना उडाएका छन् । 

सुदूरपश्चिमको कैलाली र कञ्चनपुरबाट सुरु भएको हावाहुरी शुक्रबार बिहान काठमाण्डौ सहित मध्य क्षेत्रमा आइपुगेको छ । काठमाण्डौ र आसपासमा शुक्रबार बिहानै हावाहुरी चलेको थियो ।

हावाहुरी मध्य भेगबाट पूर्वतिर सर्दै गएको मौसमविद विभूती पोखरेलले जानकारी दिनुभयो । उहाँका अनुसार केहीबेर हावाहुरी चल्ने सम्भावना छ । पश्चिमी वायु र स्थानीय वायुको प्रभावले एक्कासी हावाहुरी चलेको उहाँको भनाई छ । 

अन्तिम अपडेट: चैत १५, २०८०

तपाईको प्रतिक्रिया