सतबाँझमा लटरम्म फल्ने स्याउको स्वाद अब सम्झनामा मात्रै

जेठ २५, २०७६ शनिबार १४:४९:४९ | जयराज अवस्थी

बैतडी – कुनै समय बैतडीको सतबाँझमा विभिन्न प्रजातिका स्याउहरु लटरम्म पल्ने गर्दथे । तर पछिल्लो समय जलवायु परिवर्तनले गर्दा सतबाँझमा फल्ने स्याउको स्वाद पनि पहिलेको जस्ताे छैन ।

पहिले सतबाँझको डाँडाभरि लटरम्मै स्याउ फल्ने गरेको भए पनि पछिल्लो समय स्याउ फल्न छोडेपछि अहिले सतबाँझको स्याउको स्वादको सम्झना मात्रै बाँकी रहेको स्थानीय किसान पुष्कर भट्टले बताउनुभयो । ‘पहिले निकै हराभरा देखिने सतबाँझ पछिल्लो समय नाङ्गो डाँडाको रुपमा परिणत भएको छ’, उहाँले भन्नुभयो ।

अर्का किसान देवदत्त भट्टले पछिल्लो समय सतबाँझमा हिउँ पर्न छोडेपछि स्याउ पनि फल्न छोडेको जानकारी दिनुभयो । चिस्यानको कमी भएपछि स्याउ उत्पादन हुन छोडेको किसान भट्टले बताउनुभयो ।

‘असार महिनादेखि असोजसम्म सतबाँझमा स्याउ फल्ने भए पनि पछिल्लो दुई दशक यता स्याउ फल्न छोडेको छ’, स्थानीय बीरबहादुर टेरले भन्नुभयो । उहाँका अनुसार, पहिले सतबाँझको स्याउ किन्नको लागि धेरै मानिसहरु आउने गरेकाे तर अहिले सतबाँझमा स्याउको बोट हुर्काउनै मुश्किल भएको छ ।

स्याउ बेचेर नै दैनिक गुजारा गर्दै आएका यस क्षेत्रका किसानहरुको बारीमा अहिले स्याउको बोट देख्नै गाह्रो छ ।

स्याउ उत्पादनका लागि चिस्यान आवश्यक हुन्छ र पछिल्लो समय हिउँ कम पर्न थालेपछि स्याउ उत्पादन हुन छोडेको सुख्खा फलफूल विकास केन्द्र सतबाँझका निमित्त प्रमुख चन्द्रबहादुर ठगुन्नाले बताउनुभयो ।

स्याउ उत्पादन हुन छोडेपछि अहिले सुख्खा जातका फलफूलका बिरुवा उत्पादनमा केन्द्रले ध्यान दिएको उहाँले जनाउनुभयो । अहिले सुख्खा फलफूल विकास केन्द्रले ओखर, जैतुनलगायतका सुख्खा जातका बिरुवाहरु उत्पादन गरेको जनाएको छ ।

सतबाँझमा स्याउ फल्न छोडेपछि विसं २०१९ सालमा स्थापना भएको बागबानी विकास केन्द्रलाई सुख्खा फलफूल विकास केन्द्रको नाममा कार्यालय सञ्चालन गरिएको छ ।

अन्तिम अपडेट: मंसिर ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

जयराज अवस्थी

जयराज अवस्थी बैतडीका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्