गुठियारलाई सामन्ती भन्ने मन्त्री बाँस्कोटाले राजीनामा दिनुपर्छ: नेकपा सांसद रामवीर मानन्धर

 जेठ ३२, २०७६ शनिबार १८:२१:३७ | उज्यालो सहकर्मी
unn.prixa.net

काठमाण्डौ - नेकपाका नेता तथा सांसद रामवीर मानन्धरले गुठी प्रथालाई सामन्तवाद भनेकोमा सूचना तथा सञ्चार तथा सूचना प्रविधिमन्त्री गोकुल बाँस्कोटाको राजीनामा माग्नुभएकाे छ।

शनिबार रिपोर्टर्स क्लबमा आयोजित विशेष बहसमा सत्तारुढ दलकै नेता मानन्धरले गुठीलाई सामन्ती प्रथासँग जोडेकोमा कडा आपत्ति जनाउँदै राजीनामा दिनुपर्ने बताउनुभएकाे हाे । सरकार प्रवक्ताको रुपमा जसलाई सामन्ती भन्नुभएको छ, त्यो फिर्ता लिनुस्, होइन भने राजीनामा दिनुस्, उहाँले भन्नुभयाे ।

सडकमा ओर्लिएका जनतालाई सान्त्वना दिनुपर्नेमा मन्त्री बाँस्कोटाले आगोमा घिउ थप्ने काम गरेको मानन्धरको आरोप छ । ‘सञ्चारमन्त्रीजी, कि क्षमा माग्नुस, कि राजिनामा दिनुस्’, उहाँले भन्नुभयाे । मन्त्रीहरुको यस्तै प्रवृत्ति जारी रहे गणतन्त्रसमेत धरापमा पर्ने उहाँको तर्क थियो । 

प्रधानमन्त्री केपी ओली फर्किएपछि पनि विधेयक फिर्ता लिने निर्णय नगरे काठमाण्डौमा आन्दोलनको आँधीबेहेरी ल्याउने चेतावनीसमेत मानन्धरले दिनुभयाे ।सरकारले ल्याएको गुठी विधेयकले कसैलाई फाइदा नहुने मानन्धरको दावी छ । बाबु बाजेले गुठीमार्फत संरक्षण गरेको सम्पत्तिलाई अहिलेको सरकारले मास्न खोजेको उहाँको आरोप छ ।

साक्षात्कारमा प्रमुख प्रतिपक्षी दलका नेता तथा सांसद भिमसेन दास प्रधानले गुठी विधेयक फिर्ता नभएसम्म संसद चल्न नदिने बताउनुभयाे । कुनै पनि हालतमा विधेयक फिर्ता गर्नुपर्ने उहाँको भनाइ थियो । विधेयक फिर्ता भएन भने काठमाण्डौ जुरुक्क उठ्ने र त्यसलाई कसैले पनि रोक्न नसक्ने भन्दै प्रधानले मन्त्री बाँस्कोटा धर्म संस्कृतिबारे अनभिज्ञ हुनु दुर्भाग्य भएको बताउनुभयाे । 

त्यस्तै पशुपति विकास क्षेत्र विकास कोषका पूर्व सदस्य सचिव गोविन्द टण्डनले पनि सरकारले ल्याएको गुठी विधेयकले संस्कृतिमाथि हस्तक्षेप गर्न खोजेको आरोप लगाउनुभयाे । गुठियारहरुको सम्पत्तिको सम्मान गर्दै सरकारले उचित निर्णय गर्नुपर्ने सुझाव दिँदै टण्डनले गुठी भनेका पूर्वजहरुले गुठियारहरुलाई संरक्षण गर भनेर दिएको सम्पत्ति भएकाे बताउनुभयाे ।


 

अन्तिम अपडेट: चैत २, २०८०

तपाईको प्रतिक्रिया