महाराष्ट्रमा कसैले सरकार बनाउन सकेनन्, राष्ट्रपति शासन लागू

कात्तिक २६, २०७६ मंगलबार १९:१०:५६ | एजेन्सी

भारतको महाराष्ट्र राज्यमा राष्ट्रपति शासन लागू भएको छ । गएको १५ दिनदेखि सत्ताका लागि उथलपुथल भए पनि कुनै पनि दलले बहुमत सिद्ध गर्न नसकेपछि महाराष्ट्रमा राष्ट्रपति शासन लागू भएको हो ।

मंगलबार भारतका राष्ट्रपति रामनाथ कोबिन्दले महाराष्ट्रका राज्यपाल भगत सिंह कोश्यारीले गरेको सिफारिसलाई अनुमोदन गर्नु भएको हो । राज्यपाल कोश्यारीले महाराष्ट्रमा कुनै पनि दल सरकार बनाउने अवस्थामा नरहेको भन्दै राष्ट्रपति शासन लागु गर्नु उत्तम विकल्प भएको भन्दै राष्ट्रपति कोबिन्दसँग अनुमति माग्नु भएको थियो ।

राज्यपाल कोश्यारीले भारतीय जनता पार्टी(बीजेपी), शिव सेना, नेसनलिस्ट कांग्रेस पार्टी(एनसीपी) लाई सरकार बनाउन मौका दिए पनि कसैले पनि बहुमत जुटाउन सकेनन् । सोमबार साँझसम्म दिइएको समयसीमाभित्र शिव सेनाले सरकार बनाउन नसकेपछि तेस्रो ठूलो दल एनसीपीलाई सरकार बनाउन मौका दिइएको थियो ।

एनसीपीलाई मंगलबार साँझसम्मको समय दिइएको थियो । बीजेपीले भने आफूले सरकार नबनाउने बताएको थियो ।

यस्तो छ महाराष्ट्रको गणित

२८८ सिट रहेको महाराष्ट्र विधानसभामा सरकार बनाउन १४५ सिट आवश्य हुन्छ । २४ अक्टोबरमा आएको चुनावी नतिजाअनुसार बीजेपीले १०५ सिटमा जित हात पार्दै ठूलो पार्टी बनेको थियो । त्यस्तै शिव सेनाले ५६ सिटमा जित हात पार्दा एनसीपीले ५४ सिट जितेको थियो । त्यस्तै कांग्रेसले ४४ सिटमा जित हात पारेको थियो ।

एनसीपीका नेतासँग छलफल गर्दै राज्यपाल भगतसिंह काेश्यारी

गठबन्धन बनाएर चुनाव लडे पनि मुख्यमन्त्री पदका विषयमा विवाद भएपछि शिव सेना र बीजेपीबीच सम्बन्ध बिग्रिएको हो । शिव सेनाका अध्यक्ष उद्धव ठाकरेले बीजेपीसँग मुख्यमन्त्रीमा आलोपालोको सहमति भएको भन्दै बीजेपीले सहमति तोडेको आरोप लगाउनु भएको छ ।

शिव सेनाले एनसीपी र कांग्रेसकाे समर्थन जुटाउने अनेकाैँ प्रयास गरे पनि सफल भएन ।

भारतीय गृह मन्त्रालयका अनुसार महाराष्ट्र विधानसभा निलम्बित भएकाे छ ।

शिव सेना अदालतमा

सरकार बनाउन समय नदिएको भन्दै शिव सेना सर्वोच्च अदालत पुगेको छ । शिव सेनाको तर्फबाट कांग्रेसका वरिष्ठ नेता कपिल सिब्बल वकिल रहेका छन् ।

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्