बेलायत आमचुनाव : बोरिस जोनसोनको कन्जर्भेटिभ पार्टीलाई पूर्ण बहुमत- 'एक्जिट पोल'

मंसिर २७, २०७६ शुक्रबार ७:३:३० | एजेन्सी

काठमाण्डौ – बेलायतको आमचुनावमा कन्जर्भेटिभ पार्टी फेरि एकपटक सत्तामा फर्किने संकेत देखिएको छ ।

बिहीबार स्थानीय समयअनुसार बिहान ७ बजेदेखि राति १० बजेसम्म मतदान भएको थियो । मनदान सकिएलगत्तै बीबीसी–स्काई–आईटिभीले ‘एक्जिट पोल’ जारी गरेका छन् ।

जारी गरिएको एक्जिट पोलमा बोरिस जोनसनको कन्जर्भेटिभ पार्टीलाई पूर्ण बहुमत मिल्ने संकेत देखिएको छ ।

एक्जिट पोलका अनुसार ६ सय ५० सिटको संसदमा कन्जर्भेटिभ पार्टीलाई ३ सय ६८, लेबर पार्टीलाई १ सय ९१, लिबरल डेमोक्रेट्सलाई १३, एसएनपीलाई ५५ र ब्रेक्जिट पार्टीलाई भने एक पनि सिट मिलेको देखिँदैन ।

कन्जर्भेटिभ पार्टीलाई सन् २०१७ को चुनावको नतिजाभन्दा ५० सिट फाइदा भएको देख्न सकिन्छ । सरकार बनाउनका लागि कुनै पनि पार्टीलाई ३ सय २६ सांसदको समर्थन जरुरी हुन्छ ।

आफ्नो पहिलो प्रतिक्रियामा प्रधानमन्त्री बोरिस जोनसनले ट्वीट गरेका छन्, ‘हाम्रो महान देशमा मतदान गर्ने सबैलाई धन्यवाद । हामीले पार्टीको लागि काम गर्यौँ, पार्टीको उम्मेदवार बन्यौँ । हामी विश्वको सबैभन्दा ठूलो लोकतन्त्रमा छौँ ।’

यता लेबर पार्टीका शैडो चान्सलरले जोन म्याकडनलले भने यदि एक्जिट पोल सही हुने हो भने निकै निराशाजनक हुने प्रतिक्रिया दिएका छन् । उनले भने, ‘मैले प्रतिस्पर्धा निकै टक्करको हुने सोचेको थिएँ । सबैले यही सोचेका थिए कि दुई पार्टीको अन्तर निकै कम हुन्छ ।’

यदि नतिजा एक्जिट पोलकाअनुसार आयो भने सन् १९८७ पछि कन्जर्भेटिभ पार्टीको सबैभन्दा ठूलो जित हुनेछ । त्यस्तै लेबर पार्टीको लागि सन् १९३५ पछि सबैभन्दा खराब प्रदर्शन हुनेछ, जसको ७१ सिट गुमेको देखिएको छ ।

एक्जिट पोल आएसँगै ट्विटरमा ट्रेण्ड चलेको छ । लेबरका एक उम्मेदवार सियोभान म्याकडोनाले कोर्बिनलाई निशाना बनाउँदै ट्वीट गरेका छन्, ‘यो एक जना मानिसको गल्तीले भएको हो । उनको चुनाव प्रचार, घोषणापत्र र उनको नेतृत्व ।’

— Siobhain McDonagh (@Siobhain_Mc) December 12, 2019

एक्जिट पोलमा कन्जर्भेटिभ पार्टीलाई बहुमत मिलेको देखेपछि बेलायती मुद्रा पाउण्डमा पनि वृद्धि भएको देख्न सकिन्छ ।

५ वर्षभन्दा कम समयको अवधिमा बेलायतमा यो तेस्रो चुनाव हो । सन् २०१५ र सन् २०१७ मा पनि बेलायतमा चुनाव भएको थियो । त्यस्तै गएको १ सय वर्षमा डिसेम्बर महिनामा भएको यो पहिलो आमचुनाव हो ।

बिहीबार मतदान सुरु हुनेबित्तिकै प्रधानमन्त्री बोरिस जोनसन, लेबर पार्टीका नेता जेरेमी कोर्बिन, लिबरल डेमोक्रेट पार्टीका नेता जो स्विनसन, एसएनपीकी नेतृ निकोला स्टरजियोनले मतदान केन्द्रमा गएर आ–आफ्नो भोट खसालेका थिए । तर ब्रेक्जिट नेता निजेल फराजले मतदान गर्न पोस्टल ब्यालेटको प्रयोग गरेका थिए ।

नतिजाले ब्रेक्जिटमा कस्तो असर गर्छ ?

यदि अन्तिम नतिजा एक्जिट पोलअनुसार आयो भने प्रधानमन्त्री बोरिस जोनसोन आफ्नो शर्तमा युरोपेली संघ (इयू) बाट अलग हुनेछन् ।

गृह मन्त्री प्रीति पटेलले नयाँ सरकार ब्रेक्जिट लागू गर्न तत्काल कदम उठाउने बताएकी छिन् । उनका अनुसर क्रिमसमअघि नै संसदमा विधायक पेस गरिनेछ ।

अन्तिम अपडेट: मंसिर ६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्