स्वास्थ्य क्षेत्रका समस्या देख्दा कहाली लाग्छ तर त्यसलाई सफा गर्नुको विकल्प छैन : स्वास्थ्य मन्त्री ढकाल

माघ ३, २०७६ शुक्रबार ७:२८:४ | रासस

कास्की – स्वास्थ्य तथा जनसङ्ख्या मन्त्री भानुभक्त ढकालले मन्त्रालयभित्रबाटै शुद्धीकरणको अभियान चलाउनु पर्दछ भन्ने मान्यताका साथ आफू अघि बढेको बताउनु भएको छ ।

पोखरा स्वास्थ्य विज्ञान प्रतिष्ठान, पश्चिमाञ्चल क्षेत्रीय अस्पताल पोखराले बिहीबार आयोजना गरेको स्वागत कार्यक्रममा उहाँले सुरुवातमा मन्त्रालयको बेथितिलाई समाधान गरिने उल्लेख गर्नु भयो ।

उहाँले भन्नुभयो, 'शुद्धीकरणका लागि प्रतिष्ठान तथा सङ्घका अस्पताल छन् तर मन्त्रालयको बेथितिलाई सबैभन्दा पहिला ठिक ठाउँमा ल्याउनु पर्दछ, त्यसका लागि तल धमिलो पानीलाई सङ्लो बनाउने होइन मुहान सङ्लो बनाउँदा तल धमिलो हट्दै जान्छ भन्नेमा छु ।'

आर्थिक अनियमितता र भ्रष्टाचारको विरासतमा रमाउने प्रवृत्तिले गर्दा बीपी कोइराला स्वास्थ्य विज्ञान प्रतिष्ठान, वीर अस्पताललगायत अस्पताल थला पर्दछन् कि भन्ने चिन्तामा आफू रहेको मन्त्री ढकालको टिप्पणी थियो ।

वीर अस्पतालमा ४६ करोड रुपैयाँ लागतमा किनिएका दुई वटा मेसिन लामो समयदेखि जनताको सेवामा उपयोगमा आउन नसकेको र अहिले बिग्रन्छ कि भनेर सुरक्षाकर्मीको सुरक्षामा राखिएको जानकारी प्राप्त भएको बताउँदै उहाँले त्यसमा अनियमितता रहेको उल्लेख गर्नु भयो ।

'मेसिन के का लागि किनेर जनताका लागि प्रयोग भएन भन्ने बारेमा जनताले बुझेका छन्, त्यसको अनुसन्धानका लागि समिति बनाउनु आवश्यक छैन । जे प्रयोजनका लागि किनिएको हो, त्यो किन्दा खेरि नै प्राप्त भइसकेपछि बाँकी काम मेसिनबाट हुने कुरा भएन मैले प्रतिबद्धता गरेको छु, मेरो कार्यकालमा त्यस्तो बेथिति र अनियमितताहरु हुँदैनन्', मन्त्री ढकालले भन्नु भयो ।

स्वास्थ्य क्षेत्र अन्यको तुलनामा ठूलो क्षेत्र भएकाले सुधारको अनुभूतिका लागि समय लागे पनि परिणाम आउने गरी सुधार गरेरै छाड्ने उहाँको प्रतिबद्धता थियो । मन्त्री ढकालले भन्नुभयो, 'स्वास्थ्य क्षेत्रका समस्या देख्दा कहाली लाग्छ तर त्यसलाई सफा गर्नुको मेरा लागि कुनै विकल्प छैन । मेरो नेतृत्वमा अनुभूत हुने गरी गर्नेछु ।'

मन्त्री ढकालले चिकित्सकले दुई वर्ष पहाडी तथा हिमाली जिल्लामा गएर सेवा गर्नुको विकल्प नभएको बताउँदै त्यसमा कुनै सम्झौता नहुने स्पष्ट पार्नु भयो । पूर्वस्वास्थ्य मन्त्री एवं प्रतिनिधि सभाका सांसद खगराज अधिकारीले स्वास्थ्य बीमा कार्यक्रमलाई प्रभावकारी बनाउँदै लगातार तीन दिनभन्दा बढी बहिरङ्ग विभागको सेवा बन्द हुन नहुनेमा जोड दिनु भयो ।

स्वास्थ्य सचिव खगराज बरालले अस्पतालको अनुगमन गर्ने क्रममा आफूहरु पोखरामा रहेको बताउँदै सरकारले अराजकतालाई सहन नसक्ने भएकाले सङ्घमा समायोजन भएका चिकित्सकहरु अब पनि खटाएको ठाउँमा हाजिरी नभए मन्त्रालयमा फिर्ता पठाउन र उनीहरुमाथि मन्त्रालयले कारबाही गर्ने बताउनु भयो ।

प्रतिष्ठानका सिनेटर सदस्य आनन्दराज मुल्मीले अन्य प्रदेशका नागरिकलाई सेवा दिने गरी अस्पतालको सेवालाई तुलनात्मकरुपमा उत्कृष्ट बनाउनु पर्नेमा जोड दिनुभयो ।

प्रतिष्ठानका उपकुलपति डा. बुद्धिबहादुर थापाले पोष्ट ग्र्याजुएट (पीजी) को १७ सिटका लागि प्रवेश परीक्षाको लागि आवेदन दर्ता सुरु भएको बताउँदै आउँदा दिनमा नर्सिङ, बीडीएसलगायत विषयको अध्यापन गराउने योजना रहेको जानकारी दिनु भयो ।

अस्पतालका निर्देशक सहप्राध्यापक डा. अर्जुन आचार्यले दरबन्दीअुनसार विशेषज्ञ चिकित्सक अभाव, बिरामीको भिड बढेको लगायत अस्पतालका समस्याका बारेमा जानकारी गराउनु भएको थियो ।

अन्तिम अपडेट: मंसिर ८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

स्वास्थ्य क्षेत्रका समस्या देख्दा कहाली लाग्छ तर त्यसलाई सफा गर्नुको विकल्प छैन : स्वास्थ्य मन्त्री ढकाल

फाइल फोटो

तपाईको प्रतिक्रिया