आज साँझसम्म पश्चिमी न्यूनचापीय प्रणाली नेपाल प्रवेश गर्ने : बदलीसँगै वर्षाको सम्भावना

 माघ १२, २०७६ आइतबार १६:३८:१२ | रासस
unn.prixa.net

काठमाण्डाै - भारतको उत्तरपूर्वी भू–भागमा विकसित भएको मौसमी प्रणालीका कारण नेपालको पूर्वी, मध्य र पश्चिमका केही भेगमा मौसम बदली भएको छ ।

त्यस मौसमी प्रणालीले अहिले देशका पूर्व र मध्यका सबै भूभाग तथा पश्चिमको बाग्लुङ र पर्वतपूर्व बाहेकका पहाडी जिल्लामा आंशिकदेखि सामान्य बदली रहेको जल तथा मौसम विज्ञान विभाग, मौसम पूर्वानुमान महाशाखाले जनाएको छ ।

महाशाखाका मौसमविद् मञ्जु बासीले बदलीसँगै देशका मध्य र पूर्वका एक÷दुई स्थानमा हल्का वर्षाको सम्भावना रहेको बताउनुभयो । सोमबारदेखि मौसममा क्रमिक सुधार आए पनि साँझतिर पुनः पश्चिमी न्यूनचापीय प्रणाली नेपाल प्रवेश गर्ने भएकाले अझै केही दिन मौसम बिग्रने उहाँले उल्लेख गर्नुभयो ।

मौसमविद् बासीका अनुसार मौसमी प्रणाली भित्रिए पनि काठमाण्डौ उपत्यकाको न्यूनतम तापक्रम भने वृद्धि हुनेछैन   ।

काठमाण्डौ उपत्यकामा आइतबार बिहानैदेखि मौसम बदली भएर घाम नलागेका कारण बढी चिसो महसुस गरिएको छ । देशका पूर्व, मध्य र पश्चिम तराई क्षेत्रमा बिहान हुस्सु र कुहिरो लागे पनि अपराह्नदेखि कुहिरो हटिसकेको छ ।

आइतबार काठमाडौँको न्यूनतम तापक्रम चार दशमलव चार डिग्री सेल्सियस र अधिकतम तापक्रम १६ दशमलव आठ डिग्री सेल्सियस रहेको छ । 

शनिबार र अघिल्ला केही दिन काठमाण्डौ उपत्यकाको न्यूनतम तापक्रम दुईदेखि तीन डिग्रीको हाराहारीमा पुगे पनि घाम लागेका कारण चिसो कम भएको थियो । माघ महिनामा दिउँसोपख घाम लागे पनि बिहान र बेलुका बढी चिसो हुने गरेको छ ।

अन्तिम अपडेट: माघ २०, २०७६

तपाईको प्रतिक्रिया