केसीको जीवनरक्षा पहिलो प्राथमिकता : नारायणकाजी श्रेष्ठ

साउन ७, २०७५ सोमबार १३:२९:१० | किरण लोहनी

गोरखा – नेपाल कम्युनिस्ट पार्टी नेकपाका प्रवक्ता नारायणकाजी श्रेष्ठले अनसनरत डाक्टर गोविन्द केसीको जीवनरक्षालाई सरकारले पहिलो प्राथमिकता दिएको बताउनुभएको छ ।

वार्ताद्वारा उहाँका माग सम्बोधनलाई दोस्रो प्राथमिकता दिइएको श्रेष्ठको भनाई छ । गृह जिल्ला गोरखामा पत्रकारसँग कुरा गर्दै उहाले भन्नुभयो, ‘सरकार बिना पूर्वाग्रह केसीको मागका विषयमा कुरा गर्न आतुर छ, छिटोभन्दा छिटो उहाँको अनसन टुङ्गिने अवस्था बनाउछौँ’, चिकित्सा शिक्षा सुधारको माग राखेर अनसन बसेका डाक्टर केसीको मुद्धालाई लिएर राजनीतिकरण भएको प्रति श्रेष्ठले असन्तुष्टि जनाउनुभयो । ‘केसी अनसन बसे पनि नबसे पनि चिकित्सा शिक्षा सुधार गरी स्वास्थ्य सेवालाई सहज, सरल र गुणस्तरीय बनाउनु सरकारको दायित्वभित्र पर्छ’ प्रवक्ता श्रेष्ठले भन्नुभयो, ‘त्यसका लागि माथेमा कार्यदलको प्रतिवेदनलाई सन्दर्भ सामग्रीको रुपमा लिन सकिन्छ ।’

केसीका सबै माग पूरा हुनैपर्छ भन्ने पक्षमा आफू नरहेको श्रेष्ठले बताउनुभयो । ‘उहाँले जे–जे भन्नु भएको छ, सबै त्यही गर्ने भन्ने पनि होइन, उहाँले भन्नु भएको केही पनि नगर्ने भन्ने पनि होइन’, श्रेष्ठले भन्नुभयो, ‘सरकारले विवेकसम्मत निर्णय गर्छ ।’

केसीको अनसनभित्रैबाट चलखेल सुरु भएको नेकपा प्रवक्ता श्रेष्ठको आरोप छ । ‘सरकारलाई अप्ठ्यारोमा पार्ने उद्धेश्यसहित विभिन्न चलखेल सुरु भएको छ, यसले समस्या समाधान गर्दैन ।’

नेकपाकै कतिपय जनवर्गीय संघसंगठनले माग गरेजस्तो मेडिकल कलेज निजीकरणको पक्षमा सरकार र पार्टीभित्र छलफल नभैसकेको श्रेष्ठले बताउनुभयो । श्रेष्ठले भन्नुभयो, ‘त्यसका विभिन्न मोडालिटीबारे छलफल गर्न सकिन्छ तर त्यसो गरेको खण्डमा पनि व्यक्तिगत सम्पत्ति सरकारले हरण गर्यो भनेर एकथरीले विरोध गर्छन् ।’

तर नवउदारीकरणको नीतिले शिक्षा र स्वास्थको क्षेत्रमा विकृति भने ल्याएको उहाँको भनाई छ । निजी मेडिकललाई सरकारीकरण गर्ने विकल्प पनि सरकारसँग रहेको तर्फ संकेत गर्दै प्रवक्ता श्रेष्ठले भन्नुभयो, ‘हामी नवउदारवादको अन्ध समर्थन पनि गर्दैनौँ ।’

केसीसँग वार्ता गरेर समस्याको हल खोजे पनि चिकित्सा शिक्षा विधेयकबारे संसदमा छलफल हुन पाउनु पर्ने श्रेष्ठले बताउनुभयो, ‘संसदभित्र प्रवेश गरेको विषयको अन्तिम टुङ्गो संसदले नै गर्नुपर्छ ।’

अन्तिम अपडेट: मंसिर ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

किरण लोहनी

उज्यालोका गोरखा सम्वाददाता किरण लोहनी गोरखाको च्वाइस एफएममा पनि काम गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्