काठमाण्डाै – सरकारले २० लाख पर्यटक ल्याउने लक्ष्यसहित नेपाल भ्रमण वर्ष मनाइ रहे पनि नेपाल आउने पर्यटकको सङ्ख्या भने घटेको छ ।

सन् २०१९ को जनवरी महिनाको तुलनामा सन् २०२० को जनवरीमा नेपाल आउने पर्यटकको सङ्ख्या झण्डै २५ हजारले घटेको अध्यागमन विभागले जनाएको छ ।

सन् २०१९ को जनवरी महिनामा ९१ हजार सात सय पर्यटक नेपाल आएकोमा यो वर्षको जनवरी महिनामा ६७ हजार २० जना पर्यटक मात्रै नेपाल आएका छन् । यो सङ्ख्या गएको वर्षको जनवरी महिनाको तुलनामा २४ हजार ६ सय ८० जनाले कम हो ।   

त्रिभुवन अन्तर्राष्ट्रिय विमानस्थल हुँदै आएका पर्यटक र स्थलमार्ग हुँदै आएका भारतबाहेक तेस्रो देशका पर्यटकको सङ्ख्या गन्ती हुने र याे वर्षकाे जनवरीमा ६७ हजार २० जना आएको अध्यागमन विभागले जनाएको छ । 

जनवरीमा भारत र चीनका पर्यटक केही बढे पनि अन्य देशबाट आउने पर्यटक घटेको विभागले जनाएको छ । हवाइ र स्थलमार्ग हुँदै जनवरीमा चीनबाट १३ हजार ९ सय ५८ जना पर्यटक नेपाल आएका थिए । 

जनवरीभन्दा फेव्रुअरी महिनामा नेपाल आउने पर्यटकको सङ्ख्या झन् कम हुँदै गइरहेको पनि अध्यागमन विभागले जनाएको छ । चीनबाट फैलिएको कोरोना भाइरसको कारण पर्यटक घटेको हुनसक्ने अनुमान रहेको छ ।