समयसँगै क्रिकेट खेलको प्रारुपमा मात्रै परिवर्तन होइन, यसका उच्च स्कोरिङ पनि हुँदै आएको छ । केही महिना अगाडि इंग्ल्याण्डले ४ सय ८१ रन बनाउँदै एकदिवसीय क्रिकेटमा एउटा इतिहास बनाएको थियो । 

तर मंगलबार क्रिकेटमा एउटा त्यस्तै समाचार आयो जसले १५२ वर्ष पुरानो रेकर्ड तोडिदिएको छ । इंग्ल्याण्डको शेफर्ड नेम क्रिकेट लिगमा बेकनह्याम क्रिकेट क्लबले लज्जास्पद अवस्थाको सामना गर्नुपरेको छ । बेकनह्याम क्रिकेट क्लबले १८ रन बनाएर सबै विकेट गुमायो । 

टस जितेर पहिले ब्याटिङ रोजेको बेकनह्यामको पारी ४९ मिनेटमै सकिएको थियो । टोलीका पाँच खेलाडीले त खाता खोल्नै सकेनन् । तीन रन अतिरिक्त रनका रुपमा पाएका थिए । बेकनह्याम ११ ओभर २ बलमा सबै विकेट गुमाउँदै १८ रनमा अलआउट भयो । 

१९ रनको विजयी लक्ष्य पाएको बेक्सले क्रिकेट क्लबले बिना विकेटको क्षतिमा ३ ओभर ३ बलमा लक्ष्य भेट्टायो । एडन ग्रिग्सले १२ रन तथा क्रिस्टोफर लासले ४ रन बनाए । 

यसका साथै बेकनह्याम क्रिकेट क्लबको १५२ वर्षको इतिहासमा यो सबैभन्दा कम स्कोर हो भने यो प्रतियोगिताको इतिहासमा पनि मंगलबार सबैभन्दा कम स्कोर बनेको हो ।