काठमाण्डौ – चीनको हुबेई प्रान्तको वुहान शहरमा विद्यालय खुलेको छ । गएको डिमेम्बर महिनामा वुहानमा नै पहिलो पटक कोरोना भाइरसको सङ्क्रमण देखिएको थियो । 

त्यसयता परीक्षाको तयारी गर्नेहरु मात्र विद्यालय जाने गरेका थिए । सरकारी सञ्चारमाध्यमका अनुसार वुहान त्यस्ता विद्यार्थीको सङ्ख्या ५७ हजार छ । 

चीनको हुबेई प्रान्तमा ३२ दिनदेखि नयाँ सङ्क्रमण देखिएको छैन । चीनको सरकारी सञ्चारमाध्यम सिन्ह्वाले यसबारेमा जानकारी दिएको हो । 

चीन अब बिस्तारै लकडाउनको प्रतिबन्ध हटाउँदै गइरहेको छ । चीनमा जनजीवन सामान्य हुँदै गइरहेको छ । 

मङ्गलबार चीनमा दुई जनामा नयँ सङ्क्रमण देखिएको थियो भने ज्यान गुमाउनेको सङ्ख्या थपिएको छैन । चीनमा अहिलेसम्म सङ्क्रमितको सङ्ख्या ८२ हजार आठ सय ८३ छ भने चार हजार ६ सय ३३ जनाको ज्यान गएको छ । 

कोरोना भाइरसकाे महामारीबाट विश्वभर ३७ लाख ४० हजारभन्दा धेरैमा सङ्क्रमण पुष्टि भएको छ । दुई लाख ५८ हजार चार सयभन्दा धेरैको ज्यान गएको छ भने १२ लाख ४७ हजारभन्दा धेरै उपचारपछि निको भएर घर फर्किएका छन् ।