काठमाण्डौ - नेप्से परिसूचक २ दशमलव ०२ प्रतिशतले घटेसँगै मंगलबारको सेयर कारोबार स्थगित भएको छ ।

५० दिनपछि खुलेको बजार २ प्रतिशत भन्दा धेरैले घटेसँगै कारोबार सुरु भएको झण्डै साढे १ घण्टामै बन्द भएको हो । लकडाउनका  कारण अर्थतन्त्रमा समस्या परेकाले शेयर बजार तीव्र गतिले घट्ने अनुमान गर्दै २ प्रतिशतभन्दा बढीले तल माथि भए कारोबार बन्द गर्ने निर्णयसहित मंगलबारदेखि कारोबार सुरु गरिएको नेपाल स्टक एक्सचेन्ज लिमिटेडले जनाएको छ ।

आज नेप्से परिसूचक २५ दशमवल ३ अंकले घटेर १२ सय २६ दशमलव १५ अंकमा झरेको छ ।

साढे १ घण्टाको कारोबारमा १० करोड ४३ लाख रुपैयाँ बराबरका १ लाख ६ हजार कित्ता सेयर किनबेच भएका छन् । मंगलबार सबै सबै उपसूचकहरु घटेका छन्। कारोबार भएका सबै कम्पनीको सेयर मूल्य घटेको छ। बैंकिङ र बीमा सूचक सबैभन्दा धेरै घटेको छ।