कोरोना परीक्षणको दायरा बढाउँदै काठमाण्डाै महानगरपालिका

जेठ १७, २०७७ शनिबार २१:८:४० | रासस

काठमाण्डौ – काठमाण्डौ महानगरपालिकाले पछिल्लो समय कोरोना भाइरस परीक्षणको दायरा बढाएको छ । काठमाण्डौका फरक–फरक ठाउँमा कोभिड–१९ का बिरामी फेला पर्न थालेपछि महानगरले परीक्षण बढाएको हो ।

यसैबीच वडा नम्बर १० बानेश्वर फूलचोकी मार्गका ४० जनामा गरिएको परीक्षणको नतिजा सङ्क्रमणरहित आएको जनाइएको छ । वडा नम्बर १० का वडाध्यक्ष रामकुमार केसीका अनुसार त्यस क्षेत्रमा बस्ने एक व्यक्तिलाई यही जेठ २ गते गरिएको परीक्षणका क्रममा कोरोना पोजेटिभ देखिएकाे थियाे । ती बिरामीको प्रत्यक्ष सम्पर्कमा रहेका ४० जनाको यही जेठ १२ गते पीसीआर र अप्रत्यक्ष सम्पर्कमा रहेका १० जनाको आरडीटी विधिबाट नमुना लिइएको थियो ।

त्यसैगरी केही दिनअघि विदेशबाट आएका एक जनामा सङ्क्रमण देखिएपछि वडा नम्बर १६ मा कन्ट्याक्ट ट्रेसिङमार्फत् २६ जनाकाे स्वाबकाे नमुना सङ्कलन गरिएको छ ।

सोह्रखुट्टे फलफूल चोक क्षेत्रमा भेटिएका बिरामीको सम्पर्कमा रहेका परिवार र आफन्तको नमुना सङ्कलन गरिएको वडाध्यक्ष मुकुन्द रिजालले जानकारी दिनुभयो ।

नमुना सङ्कलन गरिएका परिवार र व्यक्तिलाई आवत जावत गर्न र आफन्त वा अन्य कसैसँग भेटघाटमा रोक लगाइएको वडाध्यक्ष रिजालले जानकारी दिनुभयो । उहाँका अनुसार निगरानीमा राखिएका परिवारको खाद्यान्नलगायत अत्यावश्यक र दैनिक जीवनसँग सम्बन्धित काममा वडाले सहयोग गरिरहेको छ ।

सोह्रखुट्टेका ५९ वर्षीय सङ्क्रमित पुरुष अहिले अस्पतालमा उपचाररत हुनुहुन्छ । उहाँको अवस्था सामान्य रहेको पनि महानगरपालिकाले जानकारी गराएको छ । यसअघि महानगरपालिकाले जनप्रतिनिधि, सफाइमा काम गर्ने कर्मचारी र सिसडोलवासीको पनि परीक्षण गरिसकेको छ ।

पछिल्लो समय देशव्यापी रुपमा नै सङ्क्रमितको सङ्ख्या अत्यधिक रुपमा बढिरहेकाले अन्य क्षेत्रमा पनि परीक्षण बढाउने तयारी रहेको बताइएको छ ।

अन्तिम अपडेट: मंसिर ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्