गाउँपालिकाको कार्यालयमै बिजुली पुगेको छैन, सोलरले धान्दै स्थानीय सरकारको काम

साउन १७, २०७५ बिहीबार ७:१:० | बुद्ध तामाङ

भोजपुर – गाउँपालिकाको कार्यालयमै बिजुली लाइन नपुग्दा दैनिक कामकाज गर्न समस्या भएको छ । बिजुली बत्ती नहुँदा कम भोल्टेजको सोलार बत्तीको भरमा रामप्रसाद राई गाउँपालिका कार्यालयको सम्पूर्ण काम प्रभावित बनेको हो ।

कार्यालय रहेको स्थानमा घाम नग्लाग्ने भएकोले पनि सोलार सेटबाट काम सञ्चालन गर्न समस्या भएको छ । बिजुली बत्ती कार्यालयसम्म नपुग्दा सोलार बत्तीकै भरमा प्रिन्ट, फोटोकपी, कम्प्यूटर, इन्टरनेट, डकुमेन्टेसन जस्ता अत्यावश्यक काममा असहज भएको रामप्रसाद राई गाउँपालिकाका प्रमुख प्रशासकीय अधिकृत विक्रम लिम्बुले बताउनुभयो ।

‘हाम्रो गाउँपालिका ओझेल ठाउँमा पर्छ । राम्रोसँग घाम सोलारमा नपरेपछि ब्याट्री ब्याकअपले पनि धान्दैन । कतिखेर झ्याप्प जाने हो टुङ्गो हुँदैन ।’ लिम्बुले भन्नुभयोे, ‘हिउँदमा त दुःख–सुख धान्ला तर बर्षा लागेपछि भने सोलारबाट काम गर्न अति नै गाह्रो छ ।’

बिजुली बत्तीको समस्याले कार्यालयको काम गर्न कर्मचारीलाई विदाको दिनमा पनि फूर्सद हुँदैन । केन्द्रीय प्रशारणको बिजुली लाइन तान्ने पहल गरिए पनि काम हुन सकेको छैन ।

गाउँपालिकामा बिजुलीको समस्या सँगसँगै कर्मचारी अभावको पनि उत्तिकै समस्या छ । स्थानीय सरकारपछि पनि कार्यालयको प्रशासन, आर्थिक कारोबार हेर्न काम चलाउ लेखापालकै भरमा कार्यालय सञ्चालन गर्नुपर्ने अवस्था छ ।

गएको पुस ६ गते गाउँपालिकाको पहिलो गाउँसभापछि जिल्ला प्राविधिक कार्यालयले पठाएका लेखापाल प्रदीप भण्डारीको दोहोरो कार्यभार र कार्यालयमा नियमित अनुपस्थित भएपछि एक महिनामै काजमा सरुवा लिए । कार्यालयको काम गर्न गाह्रो भएपछि त्यस लगत्तै कार्यालयले महिला र भूसंरक्षण कार्यालय हेरिरहेका मनोज कुमार शर्मालाई लेखापाल नियुक्ति गरेको थियो ।

अन्य शाखा हेर्न पनि गाउँपालिकाले जिल्ला प्राविधिकमा कर्मचारी नियुक्तिको सिफारिस माग गरे पनि विभिन्न प्राविधिक समस्याले कर्मचारी दिन सकेन । पछि गाउँपालिकाले जिल्ला प्रशासन कार्यालयमार्फत अस्थायी कर्मचारी विज्ञापन खुलाई अस्थायी कर्मचारी नियुक्ति गरेको थियो । गाउँपालिकाको विषयगत कार्यालयमध्ये अहिलेसम्म शिक्षा शाखाको कार्यालयको टुङ्गो लागेको छैन ।

भौतिक योजनामध्ये अहिलेसम्म सडकको कामले मात्र गति लिएको गाउँपालिका प्रमुख विजय राईले बताउनुभयो ।

अन्तिम अपडेट: मंसिर ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

बुद्ध तामाङ

बुद्ध तामाङ भोजपुरका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्