आत्महत्या रोक्न दुई अस्पतालमा हेल्पलाइन सुरु

 भदौ २६, २०७७ शुक्रबार ८:५:३२ | रासस
unn.prixa.net

काठमाण्डाै - सरकारले आत्महत्या रोक्नका लागि दुई वटा अस्पतालमा आत्महत्या रोकथाम हेल्पलाइन सुरु गरेको छ। 

आत्महत्या रोकथाम दिवसका अवसरमा मानसिक अस्पताल लगनखेल र त्रिभुवन विश्वविद्यालय शिक्षण अस्पताल महाराजगञ्जमा हेल्पलाइन सुरु गरिएको इपिडिमियोलोजी तथा सरुवा रोग नियन्त्रण महाशाखाका नसर्ने रोग तथा मानसिक स्वास्थ्य  शाखाका प्रमुख डा‍. फणिन्द्रप्रसाद बरालले जानकारी  दिनुभयो ।

लगनखेलमा रहेको मानसिक अस्पतालमा ११६६ नम्बर र त्रिवि शिक्षण अस्पतालमा १६६०-०१-२१६०० नम्बरको फोनमा निःशुल्क हेल्पलाइनको व्यवस्था गरिएको छ । उहाँले दुवै नम्बरमा कुनै पनि व्यक्तिले फोन गरे मनोचिकित्सकबाट परामर्श पाउने बताउनुभयो ।

मानसिक अस्पतालमा बिहान ८ः ०० देखि साँझ ८ः ०० बजेसम्म र त्रिवि शिक्षण अस्पतालमा २४ घण्टा नै मनोचिकित्सकले परामर्श दिने छन् । नेपालमा हरेक दिन १७ जनाले आत्महत्या गर्ने गरेका छन् । नेपाल विश्वमा आत्महत्याबाट मृत्यु हुने देशमध्ये सातौँ स्थानमा छ ।


 

अन्तिम अपडेट: भदौ २७, २०७७

तपाईको प्रतिक्रिया