काठमाण्डाै – प्रहरीले काठमाण्डाै दुर्लभ वन्यजन्तु कछुवासहित पाँच जनालाई पक्राउ गरेको छ । पक्राउ पर्नेमा सुर्खेत भेरीगङ्गाका सर्वराज बुढा, नुवाकोट बेलकोटगढी नगरपालिका ५ बस्ने सुरेन्द्र श्रेष्ठ र प्रमोद बास्कोटा, काभ्रेपलाञ्चोक नमोबुद्ध नगरपालिका ८ बस्ने सन्तोष रम्तेल र रौतहटका रुपेश तिमिल्सिना रहेका छन् ।

विशेष सूचनाको आधारमा काठमाण्डाै महानगरापलिका १४ कलङ्कीबाट उनीहरुलाई पक्राउ गरिएको महानगरीय अपराध नियन्त्रण महाशाखाले जनाएको छ । उनीहरुलाई प्रहरी वृत्त कालिमाटी र महानगरीय अपराध महाशाखाबाट खटिएको संयुक्त टोलीले पक्राउ गरेको हो ।

गएराति चितवनबाट बिक्री वितरण गर्न कछुवा काठमाण्डाै ल्याउँदै छ भन्ने सूचनाका आधारमा उनीहरुलाई पक्राउ गरिएको महाशाखाका प्रमुख प्रहरी वरिष्ठ उपरीक्षक दीपक थापाले जानकारी दिनुभयो । उहाँका अनुसार कछुवा ३५ लाख रुपैयाँमा बिक्री गर्न मोलतोल भएको प्रारम्भिक अनुसन्धानमा खुलेको छ ।